मुंबई| मुंबईचे माजी पोलीस आयुक्त परमबीर सिंग यांची आता सीबीआयकडून चौकशी होणार आहे. त्यांच्यावरील खंडणी आणि भ्रष्टाचाराच्या आरोपांचा तपास सीबीआयने अधिकृतपणे आपल्या ताब्यात घेतला आहे. त्यामध्ये राज्य पोलिसांच्या एकूण पाच ‘एफआयआर’चा समावेश आहे. सर्वोच्च न्यायालयाने या प्रकरणी गेल्या महिन्यात आदेश दिले होते.
परमबीर सिंग यांनी तत्कालीन गृहमंत्री अनिल देशमुख यांच्यावर शंभर कोटी रुपये खंडणी गोळा केल्याचा आरोप केला होता. त्यानंतर परमबीर यांनीही मोठ्या प्रमाणात खंडणी उकळल्याचा आरोप झाला होता. या प्रकरणी ठाणे व मुंबई पोलिसांनी त्यांच्याविरुद्ध पाच गुन्हे दाखल केले होते. या पाच प्रकरणांपैकी एक प्रकरण पोलीस निरीक्षक दर्जाच्या अधिकाऱ्याच्या छळाचेही आहे. ‘ परमबीर सिंग यांनी ठाणे पोलीस आयुक्त असताना या अधिकाऱ्याला काही बेकायदा कामे करण्याच्या तोंडी सूचना दिल्या होत्या. त्या संबंधित अधिकाऱ्याने पाळल्या नाहीत. त्यामुळे त्यांचा मानसिक छळ झाला. या छळातील काही आरोपींची नावेदेखील परमबीर सिंग यांनी वगळली,’ असा आरोप आहे. अन्य एका प्रकरणात मुंबईचे पोलीस आयुक्त असताना नऊ लाख रुपये व दोन लाख ९२ हजार रुपये किमतीचे मोबाइल हँडसेट खंडणीच्या रूपात बारमालकांकडून उकळल्याचा आरोप आहे. काही प्रकरणांत तीन विकासकांकडून कोट्यवधी रुपयांची खंडणी उकळल्याचा आरोप करण्यात आला आहे.
या सर्व आरोपांचा महाराष्ट्र पोलिसांनी तपास सुरू केला होता. हा तपास थांबविण्याबाबत परमबीर सिंग यांनी मुंबई उच्च न्यायालयात धाव घेतली होती. उच्च न्यायालयाने त्यांची याचिका फेटाळली. त्यामुळे परमबीर यांनी सर्वोच्च न्यायालयात धाव घेऊन तपास सीबीआयकडे सोपविण्याची विनंती न्यायालयाला केली होती. त्या पार्श्वभूमीवर सर्वोच्च न्यायालयाने तपास सीबीआयकडे सोपविण्याचे; तसेच ठाणे व मुंबई पोलिसांचे सर्व ‘एफआयआर’देखील सीबीआयकडे हस्तांतरित करण्याचे आदेश २४ मार्च रोजी दिले होते. त्यानंतर आता सीबीआयने स्वत:चा स्वतंत्र ‘एफआयआर’ या प्रकरणात दाखल केला आहे.
दरम्यान, सीबीआयचे दिल्लीतील विशेष पथक मुंबईत दाखल होत आहे. हे पथक मुंबई सीबीआय कार्यालयाच्या सहकार्याने नव्याने तपास करील, असे सूत्रांनी सांगितले.
या तक्रारींचा होणार तपास
– पोलीस निरीक्षक दर्जाच्या अधिकाऱ्याचा छळ; परमबीर यांनी एका पोलिस निरीक्षक दर्जाच्या अधिकाऱ्यास बेकायदा काम करण्याच्या तोंडी सूचना दिल्या. त्यास नकार दिल्याने त्याचा छळ केल्याची तक्रार आहे.
– बारमालकांडून ‘मोबाइल खंडणी’. नऊ लाख रुपये व दोन लाख ९२ हजार रुपये किमतीचे मोबाइल हँडसेट बारमालकांकडून घेतल्याचा आरोप.
– विकासकांकडूनही मोठ्या प्रमाणात खंडणी वसुली करण्यात आली.
– परमबीर यांनी बिल्डरांनाही लक्ष्य केल्याचा आरोप. तीन विकासकांकडून कोट्यवधी रुपयांची खंडणी घेतल्याच्या तक्रारीचीही सीबीआय चौकशी करणार.
