ग्राहकांना पुन्हा महागाईचा झटका! CNG दरात वाढ, आता किलोमागे किती रुपये मोजावे लागणार?
Pune CNG Price Hike: पेट्रोल-डिझेलच्या वाढत्या खर्चामुळे आधीच वाहनचालकांचे बजेट बिघडले असताना आता सीएनजी वापरणाऱ्या ग्राहकांना महागाईचा आणखी एक फटका बसला आहे. Maharashtra Natural Gas Limited (MNGL) ने सीएनजीच्या दरात पुन्हा वाढ जाहीर केली आहे.
९ मे २०२६ रोजी मध्यरात्रीपासून पुणे, पिंपरी-चिंचवड आणि परिसरातील भागांमध्ये सीएनजीचा दर किलोमागे १.५० रुपयांनी वाढवण्यात आला आहे. यामुळे आधी ९०.७५ रुपये असलेला दर आता ९२.२५ रुपये प्रति किलो इतका झाला आहे. ही वाढ चाकण, तळेगाव, हिंजवडीसह आसपासच्या भागांनाही लागू होणार आहे.
हेही वाचा – पिंपरी-चिंचवड महापालिकेत ‘नगरसचिव कराराधिष्ठित’ पदासाठी उल्हास जगताप यांच्या नियुक्तीचा प्रस्ताव
एमएनजीएलकडून दिलेल्या माहितीनुसार, नैसर्गिक वायू खरेदीचा खर्च वाढल्यामुळे ही दरवाढ करण्यात आली आहे. गेल्या काही महिन्यांपासून आंतरराष्ट्रीय बाजारात गॅसच्या किंमतींमध्ये चढ-उतार सुरू आहेत. त्याचा थेट परिणाम शहरांतील सीएनजी दरांवर होत असल्याचे सांगितले जात आहे.
दरवाढीनंतर आता पुण्यातील रिक्षाचालक, कॅब चालक आणि रोज मोठ्या प्रमाणात प्रवास करणाऱ्या वाहनधारकांच्या खर्चात वाढ होणार आहे. अनेकांनी पेट्रोल-डिझेलच्या तुलनेत स्वस्त पर्याय म्हणून सीएनजी वाहनांकडे वळण्याचा निर्णय घेतला होता. मात्र वारंवार होणाऱ्या दरवाढींमुळे आता सीएनजीचे गणितही बदलू लागल्याची चर्चा वाहनचालकांमध्ये सुरू आहे.
महाईन्यूज-X वर फॉलो करा : महाईन्यूजला instagram वर फॉलो करा
