मुंबई | एकाच वस्तूचे दोन वेळा स्कॅनिंग करून ग्राहकांकडून अतिरिक्त पैसे लुबाडले जात असल्याचे समोर आले आहे. ‘महाराष्ट्र टाइम्स’च्या प्रतिनिधीने ही बनवाबनवी उघड केली. त्यानंतर ‘पैसे परत करू’, अशी भाषा वापरत प्रकरण शांत करण्याचा प्रयत्न सुपर मार्केटच्या अधिकाऱ्यांनी केला. ‘डी’ नावापासून हे सुपर मार्केट सुरू होत असून त्यांच्या अनेक ठिकाणी शाखा आहेत.
‘महाराष्ट्र टाइम्स’च्या प्रतिनिधीने ठाण्यातील कोलशेत मार्गावरील या सुपर मार्केटमधून काही वस्तू खरेदी केल्या. जवळपास १५ वस्तू होत्या. वस्तू कमी असतानादेखील देयक अधिक आल्याने प्रतिनिधीने देयक तपासले. त्यावेळी त्यामध्ये एक वस्तू दोनदा स्कॅन केल्याचे दिसले. जी वस्तू खरेदी केलीच नाही, ती वस्तू स्कॅन करून देयकात का दाखवली, असे विचारले असता संबंधित कर्मचाऱ्याने काहीच उत्तर दिले नाही. त्यानंतर वरिष्ठ अधिकाऱ्यांनी, ‘अतिरिक्त स्कॅन केलेली रोख रक्कम परत करू’, असे सांगत प्रकरण शांत करण्याचा प्रयत्न केला. परंतु अशा मोठ्या सुपर मार्केटमध्ये अशाप्रकारे एक वस्तू दोन वेळा स्कॅन का केली, याबाबत कुठलेही उत्तर देण्यात आले नाही.
या सुपर मार्केटमध्ये शनिवार-रविवारी कायम प्रचंड गर्दी असते. बिलभरणा केल्यानंतर ग्राहकांकडे देयक तपासण्यासाठी वेळदेखील नसतो. गर्दी असल्याने ग्राहकांना देयक तपासणीदेखील अनेकदा करू दिली जात नाही. त्यामुळे अशाप्रकारे एकच वस्तू दोन वेळा स्कॅन करून दिली जात असल्यास किंवा काऊंटरच्या खाली ठेवलेले अतिरिक्त सामान स्कॅन करून त्याची रक्कम ग्राहकाच्या देयकात जोडून पुन्हा बाजूला करणेही शक्य आहे. एकच वस्तू दोन वेळा स्कॅन केल्याचे उघडपणे समोर आल्याने, असे होणे सहज शक्य आहे, असे याबाबत विचारले असता संबंधित अधिकाऱ्यांकडून ‘महाराष्ट्र टाइम्स’च्या प्रतिनिधीला समाधानकारक उत्तर न देता ‘पैसे परत करू’ एवढेच सांगण्यात आले.
