मुंबई | करोना संसर्गाच्या दुसऱ्या व तिसऱ्या लाटेमध्ये पुन्हा संसर्ग झालेल्या रुग्णांचा टक्का मोठा असला, तरीही मागील १५ दिवसांमध्ये रुग्णालयामध्ये दाखल होणाऱ्या रुग्णांमध्ये यापूर्वी करोना संसर्गाची लागण न झालेली रुग्णसंख्या अधिक असल्याचे दिसून येत आहे. तिसऱ्या लाटेमध्ये करोना रुग्णांपैकी ५ टक्के रुग्णांना पुन्हा संसर्ग झाल्याचे दिसून आले होते. करोना रुग्णांच्या वैद्यकीय उपचारासाठी उभारण्यात आलेल्या सेव्हनहिल रुग्णालयामध्ये २०२० मध्ये २९, २०२१ मध्ये ८३६ तर २०२२ मध्ये ४३ अशा एकूण ९०८ रुग्णांना पुन्हा करोनाचा संसर्ग झाल्याची माहिती रुग्णालय प्रशासान दिली आहे. यावर्षी एप्रिल महिन्यामध्ये २३ जणांना तर मे महिन्यात ५१ जणांना करोनाच्या उपचारासाठी रुग्णालयामध्ये दाखल करण्यात आले. या दोन्ही महिन्यांमध्ये करोनाचा पुन्हा संसर्ग झालेल्या रुग्णांची नोंद झालेली नाही. रुग्णालयामध्ये दाखल होणाऱ्या रुग्णांमध्ये पन्नास वर्षावरील रुग्णांची संख्या अधिक असल्याचे दिसून येते.
पालिकेच्या राजावाडी रुग्णालयामध्ये करोना रुग्णांना वैद्यकीय सेवा देणाऱ्या डॉ. दीपक बैद यांनी लसीकरणामुळे प्रतिकारशक्ती विकसित होऊन करोना संसर्गाची लागण न झाल्याची शक्यता व्यक्त केली. सेव्हन हिल्स रुग्णालयाने केलेल्या अभ्यासामध्ये लस न घेतलेल्या व मरण पावलेल्या रुग्णांचे प्रमाण २०.२१ टक्के, एक मात्रा घेतलेल्या रुग्णांमध्ये मृत्यूचे प्रमाण ६.५४ टक्के इतके नोंदवण्यात आले होते. दोन्ही मात्रा घेतलेले ९४.०३ टक्के रुग्ण करोनावर मात करून बरे झाले. या रुग्णांमध्ये मृत्यूचे प्रमाण ५.९६ टक्के असल्याचे अभ्यासातून दिसून आले आहे.
पालिकेच्या वरिष्ठ वैद्यकीय अधिकाऱ्यांनी दिलेल्या माहितीनुसार करोना संसर्गाची तीव्रता वाढली. आरोग्य तसेच आप्तकालीन स्थितीमध्ये काम करणाऱ्या कर्मचाऱ्यांमध्ये संसर्गाची शक्यता किती आहे याचाही अभ्यास करण्यात येणार आहे. यापूर्वी झालेल्या अभ्यासामध्ये १४९७ आरोग्य कर्मचाऱ्यांपैकी ३९ आरोग्य कर्मचाऱ्यांना लसीकरणानंतर पुन्हा संसर्ग झाला होता.
संसर्गजन्य आजाराचे तज्ज्ञ डॉ. विशाल वैद्य यांनी आता रुग्णालयामध्ये दाखल होणाऱ्या रुग्णांमध्ये लक्षणांची तीव्रता सौम्य असून वेगळ्या प्रकारची लक्षणे दिसतात का याकडे तज्ज्ञांचे लक्ष आहे. पक्षाघातासह इतर तातडीच्या शस्त्रक्रियांसाठी दाखल होणाऱ्या काही रुग्णांच्या करोना चाचण्या पॉझिटिव्ह येत आहे. करोनाच्या चाचण्या न करणाऱ्यांची संख्याही अधिक असून एका रुग्णालयातून दुसऱ्या रुग्णालयामध्ये वैद्यकीय उपचारांसाठी जाणाऱ्या रुग्णांची प्रकृती अधिक बिघडत असल्याचे दिसून येत आहे.
