भारताचे माजी दिग्गज फिरकीपटू दिलीप दोशी यांचं हृदयविकाराच्या झटकाने निधन

मुंबई : इंग्लंड विरुद्ध टीम इंडिया यांच्यातील पहिल्या कसोटी सामनादरम्यान क्रिकेट वर्तुळातून अतिशय वाईट बातमी समोर आली आहे. भारताचे माजी स्पिनर दिलीप दोशी यांचं निधन झालं आहे. दिलीप दोशी यांचं हृदयविकाराच्या झटक्याने लंडनमध्ये निधन झालंय. दिलीप दोशी यांनी 23 जून रोजी अखेरचा श्वास घेतला. ते 77 वर्षांचे होते. पीटीआय या वृत्तसंस्थेने याबाबतचं वृत्त दिलं आहे. दिलीप दोशी यांच्या निधनाने क्रिकेट विश्वावर शोककळा पसरली आहे. दिलीप दोशी यांनी वयाच्या 32 व्या वर्षी कसोटी पदार्पण केलं. दोशींनी अवघ्या 4 वर्षांमध्ये विकेट्सचं शतक पूर्ण केलं. त्यानंतर दोशी क्रिकेटपासून लांब गेले. दोषी यांनी त्यांच्या क्रिकेट कारकिर्दीवर आत्मचरित्रही लिहिलं. ‘स्पिन पंच’ असं दोशी यांच्या आत्मचरित्राचं नाव आहे.

हेही वाचा –  माटे हायस्कूलमध्ये योग दिन उत्साहात साजरा

दिलीप दोशींची कसोटी कारकीर्द
दिलीप दोशी यांनी 1979 साली 11 सप्टेंबर रोजी ऑस्ट्रेलिया विरुद्ध एमए चिदंबरम स्टेडियमधून कसोटी पदार्पण केलं. विशेष म्हणजे दोशींनी पदार्पणात 5 विकेट्स घेण्याची कामगिरी केली होती. दोशींनी पदार्पणात एकूण 8 विकेट्स घेतल्या होत्या. तर दोशींनी एम चिन्नास्वामी स्टेडियममध्ये 14 सप्टेंबर 1983 रोजी कसोटी कारकीर्दीतील अखेरचा कसोटी सामना पाकिस्तान विरुद्ध खेळला. दोशींनी 33 कसोटी सामन्यांमधील 55 डावांमध्ये एकूण 114 विकेट्स मिळवल्या. दोशींनी 6 वेळा 5 विकेट्स घेतल्या होत्या.

एकदिवसीय कारकीर्द
दोशींची एकदिवसीय कारकीर्द 3 वर्षांची राहिली. दोशींनी 6 डिसेंबर 1980 रोजी मेलबर्नमध्ये ऑस्ट्रेलिया विरुद्ध पदार्पण केलं. तर पाकिस्तान विरुद्ध 17 डिसेंबर 1982 साली अखेरचा एकदिवसीय सामना खेळला. या दरम्यान दोशींनी 15 सामन्यांमध्ये 22 विकेट्स मिळवल्या.

महाईन्यूज-X वर फॉलो करा : महाईन्यूजला instagram वर फॉलो करा