नाशिक |
घरातील वृद्ध महिलेच्या दशक्रिया विधी कार्यक्रमात उपस्थित नसल्यासह बॅनर लावण्यावरू दोन कुटुंबात सुरू झालेला वाद थेट दगडफेक आणि कोयत्याने वार करण्यापर्यंत पोहोचला. या हल्ल्यात दोन कुटुंबातील चार जण जखमी झाले आहेत. म्हसरुळ पोलिसांच्या हद्दीत बेलदारवाडीत ही घटना घडली. या प्रकरणी दोन्ही कुटुंबातील सोळा संशयितांविरुद्ध गुन्हा दाखल करण्यात आला आहे.
म्हसरुळ येथील बेलदारवाडीत शुक्रवारी रात्री उशिरा दोन गटांत हाणामारी झाली. निफाड तालुक्यातील नैताळे एका वृद्धाच्या दशक्रिया विधीचे बॅनर येथे लावण्यात आले. त्यावरुन वाद घालत आठ पुरुषांसह तीन महिलांनी विठ्ठल रामसिंग जाधव यांच्या घरात घुसून लाठ्याकाठ्या, दगड, कोयत्यासह जाधव यांच्या कुटुंबीयांना मारहाण केली. तर, राजेंद्र रंगनाथ मोहिते यांच्या घरातही पाच संशयित शिरले. दशक्रियेच्या कार्यक्रमाला का उपस्थित नव्हते, या मुद्द्यावरुन संशयित सोलंकी आणि जाधव यांनी मोहिते यांच्या घरात वाद घातला. त्यानंतर मोहिते यांच्या चुलत भावाच्या अंगावर दगडफेक केली. घराबाहेरील एक दुचाकी फोडून मोहिते यांना दगड आणि कोयत्याने मारहाण केली. या घटनेत राजेंद्र, विनोद, अशोक आणि योगेश मोहिते जखमी झाले आहेत.
