‘महाराष्ट्राची हास्यजत्रा’मधील ओंकार भोजनेचं नशीब उजळलं, एकाच दिवशी दोन चित्रपट प्रदर्शित होणार
लोकप्रिय अभिनेता ओंकार भोजने ‘महाराष्ट्राची हास्यजत्रा’ शोमधून घराघरांत पोहोचला. विनोदबुद्धी आणि उत्तम अभिनयाच्या जोरावर त्याने मराठी कलाविश्वात अल्पावधीतच स्वत:चं वेगळं स्थान निर्माण केलं. छोट्या पडद्यावरील कॉमेडी शोप्रमाणेच त्याने चित्रपटातूनही अभिनयाचा ठसा प्रेक्षकांच्या मनावर उमटवला.
ओंकार भोजनेने ‘गर्ल्स’, ‘बॉईज २’ चित्रपटातील अभिनयाने प्रेक्षकांची मने जिंकून घेतली. ‘बॉईज २’ मध्ये त्याने साकारलेली नारूची भूमिका प्रेक्षकांच्या पसंतीस उतरली होती. आता चित्रपटाचा सिक्वेल असलेल्या ‘बॉईज ३’मधून तो प्रेक्षकांच्या भेटीला येत आहे. १६ सप्टेंबरला हा चित्रपट सर्वत्र प्रदर्शित होणार आहे. विशेष म्हणजे याच दिवशी ओंकारच्या आणखी एका मराठी चित्रपटाची मेजवानी त्याच्या चाहत्यांना मिळणार आहे.
‘रूप नगर के चीते’ हा मराठी चित्रपटदेखील येत्या १६ सप्टेंबरला प्रदर्शित होणार आहे. दोन मित्रांच्या मैत्रीच्या प्रवासाची गोष्ट या चित्रपटाच्या माध्यमातून प्रेक्षकांना पाहायला मिळणार आहे. या चित्रपटात अभिनेता करण परब आणि कुणाल शुक्ला मुख्य भूमिकेत आहेत. अभिनेता सुयश टिळकची पत्नी आणि अभिनेत्री आयुषी टिळकही या चित्रपटात झळकणार आहे. विहान सुर्यवंशी यांनी या चित्रपटाचे दिग्दर्शन केले आहे. एकाच दिवशी ओंकार भोजनेचे दोन चित्रपट प्रदर्शित होणार असल्याने चाहतेही खुश आहेत.
