मानसी घोष ठरली ‘इंडियन आयडल 15’ची विजेती: 25 लाखांसह चमचमती ट्रॉफी जिंकली!
Indian Idol 15 Winner: गेल्या पाच महिन्यांपासून टीव्हीवर सुरू असलेला लोकप्रिय गायन रिअॅलिटी शो इंडियन आयडल १५ अखेर ६ एप्रिल २०२५ रोजी संपला. रविवारी झालेल्या भव्य ग्रँड फिनालेत या हंगामाचा विजेता जाहीर झाला. कोलकात्याची २४ वर्षीय मानसी घोष हिने विजेतेपद पटकावले. तिने प्रथम टॉप ३ मध्ये स्थान मिळवले आणि नंतर शुभोजीत चक्रवर्तीला मागे टाकत ट्रॉफी आपल्या नावावर केली.
मानसीला विजेतेपदासह २५ लाख रुपयांची रोख बक्षीस रक्कम, एक नवीन कार आणि बॉशकडून गिफ्ट हॅम्पर मिळाले. विशेष म्हणजे, शोच्या सुरुवातीपासूनच मानसी विजेती मानली जात होती आणि ट्रेंडिंग पोलमध्येही ती आघाडीवर होती. तिच्या सुरील्या आवाजाने आणि दमदार सादरीकरणाने तिने प्रेक्षकांची मने जिंकली.
हेही वाचा – मुस्लिम संघाच्या शाखेत येऊ शकतात का? मोहन भागवतांनी ठेवली ‘ही’ अट, म्हणाले, ‘जे कोणी…’
मानसीसह शुभोजीत चक्रवर्ती आणि स्नेहा शंकर यांनी टॉप ३ मध्ये स्थान मिळवले होते. मानसीने विजेतेपद पटकावले, तर शुभोजीत प्रथम उपविजेता आणि स्नेहा दुसरी उपविजेती ठरली. दोघांनाही चॅनेलकडून प्रत्येकी ५ लाखांचे बक्षीस देण्यात आले. स्नेहा दुसरी उपविजेती ठरली असली, तरी तिला फिनालेपूर्वीच टी-सीरीजचे संचालक भूषण कुमार यांच्याकडून रेकॉर्डिंग कराराची ऑफर मिळाली आहे.
मानसी कोलकात्याच्या पाइकपारा, दमदम भागातील रहिवासी आहे. तिने २०१८ मध्ये क्राइस्टचर्च गर्ल्स स्कूलमधून बारावी पूर्ण केली आणि इंग्रजीमध्ये पदवी घेतली आहे. फिनालेत ९०च्या दशकाची थीम होती, जिथे श्रेया घोषाल, बादशाह आणि विशाल ददलानी यांनी परीक्षक म्हणून मार्गदर्शन केले. शोचे सूत्रसंचालन आदित्य नारायणने केले, तर रविना टंडन, शिल्पा शेट्टी आणि मीका सिंग हे खास पाहुणे म्हणून उपस्थित होते.
महाईन्यूज-X वर फॉलो करा : महाईन्यूजला instagram वर फॉलो करा
