पुणे |
कलिंगडापाठोपाठ आतून रंगाने केशरी आणि चवीला गोड असलेल्या खरबुजाला उन्हाळ्यामुळे ग्राहकांकडून मागणी वाढत आहे. पुण्याच्या मार्केट यार्डात आवक होत असलेल्या खरबुजाला सध्या गोव्यासह गुजरातच्या ग्राहकांकडून पसंती मिळत आहे. रमजान महिन्याच्या पार्श्वभूमीवर आणखी आवक होण्याची शक्यता आहे. उन्हाळ्याच्या झळा बसू लागल्याने कलिंगडासह विविध प्रकारच्या फळांची आता मागणी वाढू लागली आहे. बाजारात विविध जातींच्या खरबुजाची आवक होऊ लागली आहे.
मार्केट यार्डातील खरबुजाचे व्यापारी पांडुरंग सुपेकर म्हणाले, ‘सध्या मार्केट यार्डात नगर, सोलापूर, सातारा जिल्ह्यातून खरबुजाची आवक होत आहे. रविवारी आवक वाढली. उन्हाळ्यामुळे खरबुजाची मागणीही वाढत आहे. काही दिवसांनी रमजानचा महिना सुरू होणार आहे. त्या वेळी कलिंगड, खरबूज, सफरचंदासारख्या विविध फळांची उपवास सोडण्याकरिता मागणी होते. त्याकरिता शेतकऱ्यांनी खरबुजाची लागवड केली आहे. रमजान महिन्याच्या पार्श्वभूमीवर खरबुजाची आवक आणखी वाढेल. मात्र, मागणी वाढल्याने दर तेजीत राहतील.’
‘सध्या मार्केट यार्डात खरबुजाची २० ते २५ टेम्पोची दररोज आवक होत आहे. खरबुजाच्या सध्या दोन-तीन जाती आहे. त्यात कुंदन कोहिनूर, लायलपूर आणि शिरूर भागातील नामदेव उमाजी या जातींचा समावेश आहे. कुंदनला १५ ते २० रुपये; तर कोहिनूर जातीच्या खरबुजाला १० ते १२ रुपये दर मिळतो. कोहिनूरला सध्या ग्राहक कमी आहे,’ असे खरबुजाचे व्यापारी माउली आंबेकर यांनी सांगितले. खरबुजाच्या ज्यूससाठी ज्यूस विक्रेते, स्टॉलधारकांकडून अधिक मागणी असल्याचे सुपेकर यांनी सांगितले.
चवीला गोड, रंगाने आकर्षक असलेल्या कुंदन जातीच्या खरबुजाला ग्राहकांची विशेष पसंती असते. त्यामुळे त्या जातीच्या खरबुजाला किलोमागे १५ ते २० रुपयांपर्यंत दर मिळतात. या खरबुजाला महाबळेश्वर, गोवा, गुजरातमधून विशेष मागणी आहे.
– पांडुरंग सुपेकर, खरबुजाचे व्यापारी
