नाशिक | जिल्ह्यात करोना संसर्गाच्या शिरकावाला दोन वर्षे पूर्ण होत असून कोव्हिड काळाने जिल्हावासीयांना अनेक कटू आठवणी दिल्या आहेत. या दोन वर्षांत जिल्ह्यात तब्बल ८ हजार ८९० जीवलगांना नाशिककरांनी गमावले आहे. त्यापैकी निम्म्याहून अधिक मृत्यू एप्रिल आणि मे २०२१ या दोन महिन्यांत नोंदविले गेले आहेत.
जिल्ह्यात करोना संसर्गाचा शिरकाव होऊ नये यासाठी जानेवारी-फेब्रुवारी २०२० पासून जिल्हा प्रशासनाने प्रयत्नांची शिकस्त सुरू केली. परंतु, सुईच्या टोकावरही सहजगत्या मावणाऱ्या या विषाणूने जिल्ह्यात प्रवेश केलाच. २८ मार्च २०२० रोजी जिल्ह्यात करोनाचा पहिला रुग्ण आढळून आला. निफाड तालुक्यातील लासलगाव जवळील पिंपळगाव नजीक येथे बेकरीत कामास असलेल्या एका कर्मचाऱ्याला करोना संसर्गाचे निदान झाले. तेव्हापासून सुरू झालेला संसर्ग प्रसाराचा प्रवास अजून थांबू शकलेला नाही. या दोन वर्षांत पावणेपाच लाखांहून अधिक रुग्णांना करोनाचा संसर्ग झाला. दोन वर्षांतील ७२९ दिवसांत ४ लाख ७५ हजार ९९९ नागरिकांना करोना संसर्गामुळे कोव्हिड -१९ झाला. म्हणजेच दररोज सरासरी ६५३ जणांना करोनाचा संसर्ग झाला आहे. दररोज सरासरी १२ जणांचा करोनाने बळी घेतला आहे. या करोना लाटेत एकट्या नाशिक जिल्ह्यात हजारो संसार उद्ध्वस्त झाले आहेत. या संकटाने माणसे तर हिरावून नेलीच; परंतु त्याचबरोबर अनेकांचा रोजगारही हिरावून घेतला. करोनापश्चात म्युकर मायकोसिससारखे अन्य आजार जडल्यानेही अनेकांचा मृत्यू झाला आहे. याशिवाय रोजगार गमावल्यानेही आत्महत्या झाल्या असून अशा दुष्परिणामांची गणतीच नाही. त्यामुळे गेल्या दोन वर्षांत प्रत्येकाला करोना संसर्गाने काही ना काही कटू आठवणी दिल्या आहेत.
एप्रिल २०२१ ठरला काळा महिना
एप्रिल २०२१ हा करोनाचा काळा महिना ठरला. या महिन्यात सर्वाधिक ४ लाख ७४ हजार ३७६ स्वॅब टेस्ट करण्यात आल्या. त्यापैकी सर्वाधिक १ लाख ४२ हजार ४१२ जणांना कोव्हिडचे निदान झाले. या काळात शंभरपैकी ३० रुग्णांचे अहवाल पॉझिटिव्ह येत होते. याच महिन्यात सर्वाधिक २ हजार ८८३ रुग्णांनी जीव गमावला. त्याखालोखाल मे २०२१ मध्ये ४ लाख २७ हजार २८२ जणांचे स्वॅब तपासण्यात आले. त्यापैकी ६१ हजार ९१६ रुग्णांना करोना संसर्गाचे निदान झाले. या महिन्यात २ हजार ४२ रुग्णांचा बळी गेला. एप्रिल आणि मे २०२१ या दोन महिन्यांत एकूण ४ हजार ९२५ करोना बाधितांनी जीव गमावला. एकूण मृत्यूंपैकी निम्म्याहून अधिक मृत्यू या दोन महिन्यांत झाले.
पहिली लाट
एकूण बाधित – १,१८,५१३
सर्वाधिक पॉझिटिव्ह – २०४६ (१६ सप्टेंबर २०२०)
सर्वाधिक पॉझिटिव्हिटी दर – ३४.७६ (२३ सप्टेंबर २०२०)
सर्वाधिक सक्रिय रुग्ण – १०,८१८ (१३ सप्टेंबर २०२०)
दुसरी लाट
एकूण बाधित – २,९५,६२५
सर्वाधिक पॉझिटिव्ह – ६,८४५ (१९ एप्रिल २०२१)
सर्वाधिक पॉझिटिव्हिटी दर – ४१.५४ (१ एप्रिल २०२२)
सर्वाधिक सक्रिय रुग्ण – ४८,५७१ (२५ एप्रिल २०२१)
तिसरी लाट
एकूण बाधित – ६२,०१८
सर्वाधिक पॉझिटिव्ह – ३,०३५ (१६ जानेवारी २०२२)
सर्वाधिक पॉझिटिव्हीटी दर – ४८.७६ (२८ जानेवारी २०२२)
सर्वाधिक सक्रिय रुग्ण – १८,०१७ (२९ जानेवारी २०२२)
