पुणेकरांचा प्रवास आणखी सुसाट.! मेट्रोच्या दुसऱ्या टप्प्याला केंद्राची मंजुरी
पुणे : पुणे शहराच्या वाहतूक व्यवस्थेला बळकटी देणारा आणि प्रवाशांच्या सोयीसाठी महत्त्वाचा ठरणारा पुणे मेट्रोच्या दुसऱ्या टप्प्याला केंद्र सरकारने मंजुरी दिली आहे. पंतप्रधान नरेंद्र मोदी यांच्या अध्यक्षतेखाली झालेल्या केंद्रीय मंत्रिमंडळाच्या बैठकीत या प्रकल्पासाठी 3626.24 कोटी रुपयांच्या निधीला हिरवा कंदील दाखवण्यात आला.
यामुळे पुण्यातील मेट्रोचे जाळे विस्तारणार असून, शहरातील लाखो प्रवाशांना सुरक्षित, जलद आणि स्मार्ट वाहतूक सुविधा उपलब्ध होणार आहे. या निर्णयाचे महाराष्ट्रातील भाजप नेत्यांनी स्वागत केले असून, मुख्यमंत्री देवेंद्र फडणवीस आणि केंद्रीय राज्यमंत्री मुरलीधर मोहोळ यांनी पंतप्रधानांचे आभार मानले आहेत.
पुणे मेट्रोच्या पहिल्या टप्प्यातील वनाज-रामवाडी कॉरिडॉरच्या विस्ताराला या निर्णयाने गती मिळाली आहे. दुसऱ्या टप्प्यात खालील दोन उन्नत मार्गांचा समावेश आहे:
कॉरिडॉर 2A : वनाज ते चांदणी चौक
कॉरिडॉर 2B : रामवाडी ते वाघोली/विठ्ठलवाडी
हा 12.75 किलोमीटर लांबीचा उन्नत मेट्रो मार्ग असून, यावर 13 स्थानके प्रस्तावित आहेत. यामुळे बावधन, कोथरूड, खराडी आणि वाघोलीसारख्या पुण्यातील महत्त्वाच्या आणि वर्दळीच्या भागांना मेट्रोद्वारे जोडले जाणार आहे.
या मार्गांचे वैशिष्ट्य म्हणजे ते जिल्हा न्यायालय इंटरचेंज स्थानकावर मेट्रोच्या लाइन-1 (निगडी-कात्रज) आणि लाइन-3 (हिंजवडी-जिल्हा न्यायालय) शी जोडले जाणार आहेत. यामुळे पुण्यातील मेट्रो वाहतूक अधिक एकात्मिक आणि प्रवाशांसाठी सुविधाजनक होणार आहे.
चांदणी चौक आणि वाघोली येथे आंतरशहर बस सेवांना मेट्रोशी जोडण्याची व्यवस्था होणार आहे. यामुळे मुंबई, बेंगळुरू, छत्रपती संभाजीनगर यासारख्या शहरांतून येणाऱ्या प्रवाशांना थेट मेट्रो सुविधा मिळणार.
हेही वाचा – ज्ञानेश्वर महाराज पालखी सोहळा वाल्हेकडे मार्गस्थ; दौंडज खिंड वारकऱ्यांनी फुलली
तसेच हा मार्ग पुण्यातील आयटी हब, शैक्षणिक संस्था, निवासी आणि व्यावसायिक क्षेत्रांना जोडणारा ठरणार आहे. यामुळे लाखो प्रवाशांचा दैनंदिन प्रवास सुरक्षित आणि जलद होईल. या प्रकल्पामुळे पुण्यात स्मार्ट आणि मल्टीमोडल ट्रान्सपोर्टचा पाया रचला जाणार आहे, ज्यामुळे वाहतूक कोंडी कमी होण्यास मदत होईल.
हा 3626.24 कोटी रुपयांचा प्रकल्प महा-मेट्रोमार्फत राबवला जाणार असून, पुढील 4 वर्षांत तो पूर्ण करण्याचे नियोजन आहे. या प्रकल्पासाठी केंद्रीय राज्यमंत्री आणि पुण्याचे खासदार मुरलीधर मोहोळ यांनी सातत्याने पाठपुरावा केला होता. त्यांच्या प्रयत्नांमुळे हा प्रकल्प मार्गी लागला आहे. विशेष म्हणजे, पुणे शहरात आणखी दोन नवीन मेट्रो मार्गांचे डीपीआर (डिटेल्ड प्रोजेक्ट रिपोर्ट) तयार करण्याच्या सूचनाही देण्यात आल्या आहेत. यामुळे भविष्यात पुण्यातील मेट्रो जाळे आणखी विस्तारेल.
मुख्यमंत्री देवेंद्र फडणवीस यांनी या निर्णयाचे स्वागत करताना म्हटले, “पुणे मेट्रोच्या विस्तारामुळे शहरातील वाहतूक व्यवस्था सुधारेल आणि नागरिकांना जलद प्रवासाची सुविधा मिळेल.” केंद्रीय राज्यमंत्री मुरलीधर मोहोळ यांनी पंतप्रधान नरेंद्र मोदी आणि केंद्र सरकारचे आभार मानले. ते म्हणाले, “हा प्रकल्प पूर्ण झाल्यावर पुण्यातील वाहतूक कोंडी कमी होईल आणि शहराला स्मार्ट सिटीच्या दिशेने मोठी झेप घेता येईल.”
पुणे मेट्रोसोबतच केंद्रीय मंत्रिमंडळाने इतर राज्यांतील प्रकल्पांनाही मंजुरी दिली आहे. यामध्ये झारखंडमधील एका प्रकल्पासाठी 5940 कोटी रुपये. आग्रा येथील आंतरराष्ट्रीय बटाटा संशोधन केंद्रासाठी 111 कोटी रुपये दिले आहेत. या निर्णयांमुळे देशभरातील पायाभूत सुविधा आणि संशोधन क्षेत्राला चालना मिळणार आहे.
पुणे मेट्रोच्या दुसऱ्या टप्प्याच्या मंजुरीमुळे शहरातील वाहतूक व्यवस्थेत आमूलाग्र बदल घडणार आहे. आयटी हब, शैक्षणिक संस्था आणि व्यावसायिक केंद्रांना जोडणारा हा प्रकल्प पुण्याला स्मार्ट सिटीच्या दिशेने नेण्यासाठी महत्त्वाचा ठरणार आहे. येत्या काळात नव्या मेट्रो मार्गांचे डीपीआर तयार झाल्यास पुण्यातील मेट्रोचे जाळे आणखी विस्तारेल, ज्यामुळे शहरातील प्रवाशांचा प्रवास अधिक सुलभ आणि पर्यावरणपूरक होईल.
महाईन्यूज-X वर फॉलो करा : महाईन्यूजला instagram वर फॉलो करा
