सेवानिवृत्त उच्च पदस्थ अधिकाऱ्याला एक कोटी १२ लाखांचा गंडा

पिंपरी : उच्चपदस्थ अधिकारी म्हणून खासगी कंपनीतून सेवानिवृत्त झालेल्या एका ज्येष्ठ नागरिकाला गुंतवणुकीवर खात्रीशीर परताव्याचे आमिष दाखवले. गुंतवणूक करण्यास भाग पाडून एक कोटी १२ लाख ९६ हजार ३८० रुपयांची फसवणूक केली. थेरगाव येथे १ ऑक्टोबर २०२४ ते १२ फेब्रुवारी २०२५ या कालावधीत ऑनलाइन पद्धतीने फसवणुकीचा हा प्रकार घडला. दरम्यान गेल्या वर्षभरात सायबर चोरट्यांनी ३४२ कोटी ४२ लाख ७५ हजार ६९६ रुपयांची फसवणूक केल्याची माहिती या निमित्ताने पुढे आली आहे.

थेरगाव येथील एका ज्येष्ठ नागरिकाने याप्रकरणी शुक्रवारी (दि. १४ फेब्रुवारी) याप्रकरणी पिंपरी-चिंचवड सायबर पोलिस ठाण्यात फिर्याद दिली. व्हेन्टारस कंपनीमधून वेगवेगळ्या फोन क्रमांकांवरून बोलणाऱ्या व्यक्ती, अकाउंट व्यवस्थापक अबु बाकर, रोहन अग्रवाल, सपोर्ट ग्रुप जोसेफ, ईरिका व्ही नावाने बोलाणारे संशयित तसेच वेगवेगळ्य बँकेचे खातेधारक असलेल्या संशयितांच्या विरोधात पोलिसांनी गुन्हा दाखल केला.

हेही वाचा  :  ‘पीसीसीओई’च्या टीम क्रॅटोस रेसिंगचा फॉर्म्युला भारत-2025 मध्ये विक्रम!

सायबर पोलिस ठाण्याचे वरिष्ठ पोलिस निरीक्षक रविकिरण नाळे यांनी दिलेल्या माहितीनुसार, फिर्यादी हे एका खासगी कंपनीतून उच्चपदस्थ अधिकारी म्हणून निवृत्त झाले आहेत. संशयितांनी फिर्यादी यांना वेगवेगळ्या मोबाइल नंबरवरून व्हेन्टारस कंपनीमधून बोलत असल्याचे सांगितले. त्यांच्या व्हेन्टारस कंपनीमार्फत फाॅरेक्स ट्रेडिंगमध्ये गुंतवणूक केल्यानंतर खात्रीशीर जास्त परतावा देण्याचे आमिष दाखवले. त्यांच्या व्हेन्टारस कंपनीच्या वेबसाईटवर नोंदणी करण्यास व त्यावर फाॅरेक्स ट्रेडिंगकरता नमूद बँक खात्यांवर एकूण एक कोटी ३० हजार २३ लाख ५१५ रुपये भरण्यास भाग पाडले. त्यामधील २१ लाख ९१ हजार १३५ रुपये यूसडीटीमार्फत परत दिले. परंतु दिलेल्या रकमेतील चार लाख ६४ हजार रुपयांचे लिन लागल्याने त्यांनी उर्वरित रक्कम एक कोटी आठ लाख ३२ हजार ३८० रुपये व लिन रक्कम चार लाख ६४ हजार रुपये असे एकूण एक कोटी १२ लाख ९६ हजार ३८० रुपयांची फसवणूक केली. वरिष्ठ पोलिस निरीक्षक रविकिरण नाळे तपास करीत आहेत.

वर्षभरात ३४२ कोटींचा परिसरात ऑनलाइन गंडा

पिंपरी-चिंचवड पोलिस आयुक्तालय हद्दीतील नागरिकांची सायबर चोरट्यांनी २०२४ या वर्षभरात ३४२ कोटी ४२ लाख ७५ हजार ६९६ रुपयांची फसवणूक केली. यात पिंपरी-चिंचवड सायबर पोलिसांनी गेल्या वर्षभरात ३ कोटी ६७ लाख ५ हजार ४५ रुपये तक्रारदारांना सायबर चोरट्यांकडून पुन्हा मिळवून देण्यात आले आहेत.

हेल्पलाइनवर संपर्क साधण्याचे आवाहन

फसवणूक झाल्यास जवळच्या किंवा सायबर पोलिस ठाण्यास संपर्क साधून तक्रार करावी. www.cybercrime.gov.in किंवा १९३० या हेल्पलाइनवर संपर्क साधण्याचे आवाहन पोलिसांनी केले आहे. आर्थिक गुंतवणूक करण्यासाठी सेबीकडे नोंदणी असलेल्या स्ट्रॉक ट्रेडिंग अॅपचा वापर करावा. व्हॉटसअॅप, टेलिग्राम, इन्स्टाग्राम किंवा फेसबुकसह इतर सोशल मीडियावरील फेक अॅपचा वापर करू नये. अॅपच्या नावामध्ये साम्य असले तरी असे अॅप फसवणुकीसाठीच वापरले जातात.

महाईन्यूज-X वर फॉलो करा : महाईन्यूजला instagram वर फॉलो करा