पत्नीचा खून केला, मीही आत्महत्या करतोय; फोनवरुन भावाला माहिती देत घेतली विहिरीत उडी
चंद्रपूरः पत्नीचा खून केल्यानंतर पतीनेही आत्महत्या केल्याची घटना सोमवारी दुपारी देवाडातील महाकालीनगरात घडली. आत्महत्येपूर्वी त्याने मोठ्या भावाला घटनेची माहिती फोनवरून दिली होती.चंद्रपूरपासून सुमारे चार किमी अंतरावर पडोली पोलिस स्टेशनअंतर्गत हे गाव येते. गावात सुधाकर डाहुले (४०) व स्नेहा डाहुले (३६) हे दोन मुलींसोबत राहत होते. सोमवारी दोन्ही मुली शाळेत गेल्या असताना दोघांमध्ये अचानक वाद झाला. या वादातून संतप्त होत सुधाकरने स्नेहाचा गळा आवळून खून केला. घुग्घुसमध्ये राहणाऱ्या मोठ्या भावाला पत्नीचा खून केल्याची माहिती दिली. सोबतच आपणही आत्महत्या करीत असल्याचे सांगितले. यानंतर घरापासून जवळच असलेल्या विहिरीत उडी घेतली. सुधाकर हा इलेक्ट्रिकची कामे करीत होता. नेमका वाद काय होता हे तपासानंतर स्पष्ट होईल, अशी माहिती पोलिसांनी दिली.
दरम्यान, आत्महत्येपूर्वी सुधाकरने लिहून ठेवलेली चिठ्ठी सापडली आहे. यात त्याने ‘मी नालायक आहे. तुमच्या कोणत्याही इच्छा पूर्ण करू शकत नाही. माझ्या मुलीचा सांभाळ करशील’, असे भावाला म्हटले आहे.