गुणरत्न सदावर्तेंना मोठा धक्का, अकोट पोलीस घेणार ताब्यात; ‘हे’ आहे कारण…

अ‍ॅड. गुणरत्न सदावर्ते यांच्यासह त्यांची पत्नी अ‍ॅड. जयश्री पाटील, औरंगाबादचा अजयकुमार गुजर आणि प्रफुल्ल गावंडे यांच्यावर एसटी कर्मचाऱ्यांकडून ३०० ते ४०० रुपये गोळा करून फसवणूक केल्याचा आरोप आहे. तब्बल ७४ हजार कर्मचाऱ्यांना फसवल्याचा आरोप आहे. इतकच नाही तर न्यायालयात प्रकरण दाखल करण्यासाठी पैसे गोळा केल्याचा देखील त्यांच्यावर आरोप आहे. काल शुक्रवारी या प्रकरणातील आरोपी अजयकुमार गुजर आणि बस वाहक प्रफुल गावंडे यांना ताब्यात घेतले असून उशिरा रात्री त्यांच्यावर अटकेची कारवाई करण्यात आली आहे.

आज शनिवारी दुपारी ३ वाजता अकोट न्यायालयात हजर करणार असून त्यांची पोलीस कोठडीची मागणी अकोट पोलीस करणार आहे. दरम्यान, महाराष्ट्र एसटी कामगार संघटनेचे प्रदेश कार्याध्यक्ष विजय मालोकार यांच्या तक्रारीनंतर त्यांच्यावर अकोट शहर पोलिसांत गुन्हा दाखल करण्यात आला आहे. जानेवारी महिन्यात मालोकार यांनी अकोट पोलीस स्टेशनला तक्रार दिली होती. त्यानंतर ११ एप्रिल रोजी पोलिसांनी गुन्हा दाखल झाला होता.

गुणरत्न सदावर्तेंना धक्का, अकोट पोलीस घेणार ताब्यात…

दरम्यान, अकोल्यातील अकोट शहर पोलिसात दाखल असलेल्या फसवणुकीच्या गुन्ह्यातील आरोपी असलेले गुणरत्न सदावर्ते यांचा ताबा मिळावा, अशी मागणी कोर्टाकडे आज अकोट शहर पोलिस करणार आहे. अशी माहिती अकोट शहर पोलीस स्टेशनचे पोलीस निरीक्षक प्रकाश अहिरे यांनी दिली आहे. आता पोलिसांची ही मागणी न्यायालय मान्य करणार की नाही हे पाहणे महत्वाचं असणार आहे.

न्यायालयीन लढ्यासाठी दिले पैसे…

फसवणूक प्रकरणातील आरोपी प्रफुल गावंडे यांनी काल आत्मसमर्पणपूर्वी पत्रकार परिषद घेत, त्यांनी गुणरत्न सदावर्ते आणि अजय गुजरकडून एसटी कर्मचाऱ्यांची फसवणूक झाल्याचं सांगितले, एसटी कर्मचाऱ्यांच्या न्यायालयीन लढ्यासाठी कर्मचाऱ्यांकडून पैसे गोळा करण्याचे आवाहन अजय गुजर याने केले होते. त्यांनी सदावर्तेंसोबत कॉन्फरन्स कॉलवर बोलणेही करून दिले होते. त्यांच्या आवाहनावरून अकोट आगारातील कर्मचाऱ्यांकडून ७४ हजार ४०० रुपये गोळा करण्यात आले. गुजर यांनी सांगितल्याप्रमाणे ऑनलाइन पैसे त्यांना पाठवण्यात आले. कर्मचाऱ्यांमध्ये माझ्याच मोबाईलमध्ये फोन-पे अकाऊंट असल्याने ‘मी’ पैसे वळते केले. यापेक्षा प्रकरणामध्ये माझा कुठलाच संबंध नसल्याचे प्रफुल्ल गावंडे यांनी स्पष्ट केले.

नेमकं काय होतं प्रकरण?…

संपकरी कर्मचाऱ्यांना निलंबित व बदली करण्याचे आदेश राज्य परिवहन प्रशासनाने काढले त्यातून सुटका व्हावी व आपल्यावरील उपरोक कार्यवाही रद्द व्हावी याकरीता कर्मचाऱ्यांमार्फत प्रयत्न सुरु झाले होते. कर्मचाऱ्यांच्या सदर अडचणीचा गैरफायदा घेऊन अजयकुमार बहादरसिंग गुजर आणि अ‍ॅड. गुणरत्न सदावर्ते यांनी न्यायालयात प्रकरण दाखल करून प्रशासनाद्वारे होत असलेली उपरोक्त कार्यवाही रद्द करुन देतो, अशा खोटया भुलथापा देऊन कर्मचाऱ्यांकडून प्रत्येकी ३०० ते ५०० रुपये जमा केले. यामध्ये राज्यभरातील जवळपास ७० हजार एसटी कर्मचाऱ्यांकडून गोळा केलेली रक्कम ३ कोटी रुपये असल्याचा अंदाज आहे.

याप्रमाणे अकोट आगाराचे गजानन रामभाऊ बढे (रा. कृष्णकलनी अकोला रोड, अकोट) आणि अकोट आगाराच्या इतर कर्मचाऱ्यांद्वारे संकलीत केलेले ७४ हजार ४०० रुपये १४ नोव्हेंबर २०२१ रोजी अकोट डेपो येथे म्हणून नेमणूकीवर असलेले प्रफुल गावंडे यांनी अजयकुमार गुजर यांच्या बँक खात्यामध्ये ट्रान्सफर केले आहे.