ईव्हीएमवरून ठाकरे बंधूंना आशिष शेलारांचा सवाल; ‘आदित्य ठाकरेंनीही राजीनामा द्यावा’

मुंबई : मुंबईत उद्धव ठाकरे आणि राज ठाकरे यांच्या नेतृत्वाखाली रविवारी (४ ऑक्टोबर) ‘गर्जना मोर्चा’ काढण्यात आला. निवडणूक आयोगाच्या कार्यपद्धतीवर तसेच विशेष सखोल पुनरीक्षण (SIR) प्रक्रियेवर ठाकरे बंधूंनी आक्षेप नोंदवला. या पार्श्वभूमीवर भाजप नेते आणि मंत्री आशिष शेलार यांनी ठाकरे बंधूंवर टीका केली. “राज ठाकरे आणि उद्धव ठाकरे यांनी कधीच जनतेमध्ये जाऊन निवडणूक लढवलेली नाही. आपला पराभव लपवता येत नसल्याने आरोप केले जात आहेत,” असा दावा शेलार यांनी केला.

“आदित्य ठाकरे हेही ईव्हीएमवरच निवडून आले आहेत. ते हुकूमशाहीतून निवडून आले आहेत का? निवडणूक प्रक्रियेवर आरोप करणाऱ्या उद्धव ठाकरेंनी सर्वप्रथम आदित्य ठाकरे यांचा राजीनामा घ्यावा,” असे आव्हान शेलार यांनी दिले.

शेलार यांनी राज ठाकरे यांच्या ईव्हीएमविरोधी भूमिकेवरही प्रश्न उपस्थित केला. २००९च्या विधानसभा निवडणुकीत मनसेचे १३ आमदार ईव्हीएमद्वारे झालेल्या मतदानातून निवडून आले होते, असा दावा त्यांनी केला. त्यामुळे ईव्हीएमच्या विश्वासार्हतेवर प्रश्न उपस्थित करण्याच्या भूमिकेवर शेलार यांनी आक्षेप घेतला.

हेही वाचा –  विधानपरिषद निवडणुकीसाठी भाजपचे तीन उमेदवार जाहीर; पुणे पदवीधरला स्मिता जाधव, शिक्षक मतदारसंघातून कौस्तुभ गावडे

‘SIR मतदारयादी अधिक पारदर्शक करण्यासाठी’

‘मतदारयादीचा विशेष सखोल पुनरीक्षण कार्यक्रम’ (SIR) हा मतदारयादी अधिक पारदर्शक आणि अद्ययावत करण्यासाठीचा कार्यक्रम असल्याचे शेलार यांनी म्हटले. या प्रक्रियेवर ठाकरे बंधूंनी आक्षेप घेतला आहे. रविवारी मुंबईत झालेल्या मोर्चात SIR रद्द करण्याची तसेच ईव्हीएमऐवजी बॅलेट पेपरवर मतदान घेण्याची मागणी करण्यात आली.

दरम्यान, ठाकरे बंधूंचा मोर्चा मेट्रो सिनेमा येथून मुंबई महापालिका मुख्यालयाच्या दिशेने काढण्यात आला. काँग्रेस आणि राष्ट्रवादी काँग्रेस (शरद पवार गट) यांचे नेते आणि कार्यकर्तेही मोर्चात सहभागी झाले होते.

‘भाजपला प्रशासन चालवता येत नाही’ आरोपावर प्रत्युत्तर

भारतीय जनता पक्षाला प्रशासन चालवता येत नाही, तसेच मुख्य निवडणूक आयुक्त ज्ञानेश कुमार यांची नियुक्ती पक्षपातीपणे करण्यात आल्याचे आरोप केले जात आहेत, असे सांगत शेलार यांनी हे आरोप फेटाळले. “आम्ही जनतेचे काम करतो. ठाकरे बंधूंना राजकारणात कसे काम करावे याच्या टिप्स हव्या असतील तर आम्ही देऊ,” असा टोलाही त्यांनी लगावला.

याचवेळी शेलार यांनी मुंबईतील मोर्चाला ‘गर्जना मोर्चा’ऐवजी ‘कोल्हाकुई मोर्चा’ असे संबोधत टीका केली. मात्र, SIR आणि ईव्हीएमविषयी ठाकरे बंधूंनी मांडलेल्या आक्षेपांवर निवडणूक आयोगाची भूमिका स्वतंत्र आहे.

महाईन्यूज-X वर फॉलो करा : महाईन्यूजला instagram वर फॉलो करा