विधानपरिषद निवडणुकीसाठी भाजपचे तीन उमेदवार जाहीर; पुणे पदवीधरला स्मिता जाधव, शिक्षक मतदारसंघातून कौस्तुभ गावडे

मुंबई : महाराष्ट्र विधानपरिषदेच्या पदवीधर आणि शिक्षक मतदारसंघातील निवडणुकीसाठी भारतीय जनता पक्षाने तीन उमेदवारांची घोषणा केली आहे. पक्षाच्या केंद्रीय निवडणूक समितीने ४ ऑक्टोबर रोजी या नावांना मंजुरी दिली. पुणे विभाग पदवीधर मतदारसंघातून डॉ. स्मिता योगेश जाधव, नागपूर विभाग पदवीधर मतदारसंघातून सुधाकर विठ्ठलराव कोहळे, तर पुणे विभाग शिक्षक मतदारसंघातून कौस्तुभ मुरलीधर गावडे यांना भाजपने उमेदवारी दिली आहे.

महाराष्ट्र विधानपरिषदेच्या पाच जागांसाठी ही निवडणूक होत आहे. महायुतीच्या जागावाटपानुसार भाजप तीन जागा लढवत असून उर्वरित दोन जागांपैकी एक जागा राष्ट्रवादी काँग्रेस आणि एक जागा शिवसेनेकडे असल्याचे वृत्त आहे.

पुणे पदवीधर मतदारसंघासाठी भाजपकडून डॉ. स्मिता जाधव यांना संधी देण्यात आली आहे. या जागेसाठी महायुतीतील घटक पक्षांकडूनही दावा करण्यात आला होता. मात्र, अखेर भाजपने आपला उमेदवार जाहीर केला. पुणे शिक्षक मतदारसंघासाठीही महायुतीमध्ये जागावाटपावर चर्चा सुरू होती. त्यानंतर कौस्तुभ गावडे यांचे नाव निश्चित करण्यात आले.

नागपूर पदवीधर मतदारसंघातून सुधाकर कोहळे यांना उमेदवारी देण्यात आली आहे. उमेदवारी जाहीर झाल्यानंतर कोहळे यांनी गेल्या ३५ वर्षांपासून भाजपचा कार्यकर्ता म्हणून काम करत असल्याचे सांगितले. वर्षभरापासून मतदार नोंदणीच्या कामासाठी सातत्याने मतदारसंघात फिरत असल्याचेही त्यांनी नमूद केले. मागील निवडणुकीतील त्रुटी दूर करण्यासाठी काम केल्याचा दावा त्यांनी केला. माजी आमदार अनिल सोले हे आपले गुरू असून त्यांच्या मार्गदर्शनाखाली काम करत असल्याचे कोहळे यांनी सांगितले.

हेही वाचा –  नागराज मंजुळे यांच्या हस्ते केंद्रीय युवक महोत्सवाचे उद्घाटन; नम्रता संभेराव यांच्या उपस्थितीत होणार समारोप

६ ऑक्टोबरला अर्ज भरण्याची अंतिम मुदत

निवडणूक कार्यक्रमानुसार उमेदवारी अर्ज दाखल करण्याची अंतिम तारीख ६ ऑक्टोबर आहे. ७ ऑक्टोबर रोजी अर्जांची छाननी होणार असून ९ ऑक्टोबरपर्यंत उमेदवारांना अर्ज मागे घेता येणार आहेत. २३ ऑक्टोबर रोजी मतदान होईल, तर २७ ऑक्टोबरला मतमोजणी होणार आहे. संपूर्ण निवडणूक प्रक्रिया ३१ ऑक्टोबरपर्यंत पूर्ण करण्यात येणार आहे.

दरम्यान, विधानपरिषद निवडणुकीसाठी काँग्रेसनेही नागपूर पदवीधर, पुणे शिक्षक आणि अमरावती शिक्षक मतदारसंघासाठी उमेदवार जाहीर केले आहेत. त्यामुळे आता विविध पक्षांच्या उमेदवारांच्या घोषणेनंतर निवडणुकीचे चित्र अधिक स्पष्ट होऊ लागले आहे.

महाईन्यूज-X वर फॉलो करा : महाईन्यूजला instagram वर फॉलो करा