‘संबंध परस्पर हिताच्या कसोटीवर उतरले पाहिजेत’; बांगलादेश-पाकिस्तान-चीनबाबत जयशंकर यांची स्पष्ट भूमिका

नवी दिल्ली : भारताचे शेजारी देशांसोबतचे संबंध हे परस्पर हिताच्या तत्त्वावर आधारित असले पाहिजेत, अशी स्पष्ट भूमिका परराष्ट्र मंत्री एस. जयशंकर यांनी मांडली आहे. बांगलादेश, पाकिस्तान आणि चीनसोबतच्या संबंधांवर भाष्य करताना त्यांनी प्रादेशिक तणावाच्या पार्श्वभूमीवर भारताची भूमिका स्पष्ट केली. ‘इकॉनॉमिक टाइम्स वर्ल्ड लीडर्स फोरम’मध्ये बोलताना जयशंकर यांनी शेजारी देशांनी केवळ भारताच्या हितानुसार निर्णय घ्यावेत, अशी भारताची अपेक्षा नसल्याचे सांगितले.

भारत आणि बांगलादेश यांच्यातील संबंधांबाबत बोलताना जयशंकर यांनी कोणत्याही चर्चेच्या तपशीलावर भाष्य करण्यास नकार दिला. मात्र, दोन्ही देशांमधील संबंध परस्पर हिताच्या कसोटीवर उतरले पाहिजेत, असे त्यांनी स्पष्ट केले. दोन्ही बाजूंना समान हिताचा मुद्दा किंवा सामायिक आधार सापडल्यास संबंध अधिक सुरळीतपणे पुढे नेता येतात, असेही त्यांनी सांगितले.

शेजारी देशांचे हित काय आहे, हे ओळखणे आणि त्याचा योग्य सन्मान करणे आवश्यक आहे. त्याचप्रमाणे संबंधित देशांनीही भारताच्या हिताचा विचार करावा, अशी अपेक्षा असल्याचे जयशंकर यांनी स्पष्ट केले. भारताच्या सर्व शेजारी देशांसोबतच्या संबंधांमध्ये परस्परतेचे हेच तत्त्व लागू होते, असे त्यांनी सांगितले.

हेही वाचा –  रुग्णांच्या नातेवाईकांना मिळणार निवारा, भोजन आणि मार्गदर्शन; मुख्यमंत्री फडणवीसांचा मोठा निर्णय

बांगलादेशने माजी पंतप्रधान शेख हसीना यांच्या प्रत्यार्पणाची मागणी केली आहे. तसेच बांगलादेशचे संभाव्य पंतप्रधान तारिक रहमान यांच्या भारत दौऱ्याचा मुद्दा हसीना यांच्या प्रत्यार्पणाशी जोडला जात असल्याच्या चर्चेच्या पार्श्वभूमीवर जयशंकर यांना प्रश्न विचारण्यात आला. यावर त्यांनी भारत-बांगलादेश चर्चेच्या तपशीलावर भाष्य करण्याचे टाळले.

पाकिस्तानबाबत भारताची भूमिका कठोर

पाकिस्तानबाबत बोलताना जयशंकर यांनी दहशतवादाचा मुद्दा अत्यंत गंभीर असल्याचे स्पष्ट केले. भारत सरकारला या विषयावर देशातील जनमताकडे दुर्लक्ष करता येणार नाही, असे त्यांनी सांगितले.

पाकिस्तान भारताचा शेजारी असल्यामुळेच इतर देशांपेक्षा वेगळा नाही, तर भारताविरोधात दहशतवादाचा वापर करण्याच्या त्याच्या सातत्यपूर्ण धोरणामुळे तो वेगळा असल्याचे जयशंकर यांनी म्हटले. भारताच्या शेजारी देशावर हल्ला करण्यासाठी आणि दबाव आणण्यासाठी दहशतवादाचा पद्धतशीर वापर करणारा दुसरा कोणताही देश नसल्याची टीकाही त्यांनी केली.

अमेरिका-पाकिस्तान संबंधांवरही भाष्य

अमेरिका आणि पाकिस्तानमधील संबंध सुधारत असल्याचा भारतावर काय परिणाम होऊ शकतो, या प्रश्नावर जयशंकर यांनी अमेरिका आणि पाकिस्तानचे संबंध अनेक दशकांपासून असल्याचे नमूद केले. मात्र, भारताविरोधात दहशतवादाचा वापर करण्याच्या पाकिस्तानच्या भूमिकेवर भारताची भूमिका स्पष्ट आणि कठोर असल्याचे त्यांनी अधोरेखित केले.

महाईन्यूज-X वर फॉलो करा : महाईन्यूजला instagram वर फॉलो करा