वाकड-ताथवडे अल्पवयीन मुलीवरील लैंगिक अत्याचार प्रकरण : तपासासाठी पिंपरी-चिंचवड पोलिसांचे एसआयटी स्थापन; आरोपीला ७ दिवसांची पोलीस कोठडी

पिंपरी-चिंचवड | प्रतिनिधी : वाकड-ताथवडे परिसरातील अल्पवयीन मुलीवरील लैंगिक अत्याचार प्रकरणाचा तपास अधिक प्रभावी, पारदर्शक आणि वेगाने पूर्ण करण्यासाठी पिंपरी-चिंचवड पोलिसांनी विशेष तपास पथक (एसआयटी) स्थापन केले आहे. या पथकाच्या प्रमुखपदी सहाय्यक पोलीस आयुक्त (एसीपी) सुनील कुऱ्हाडे यांची नियुक्ती करण्यात आली असून, पथकात पाच अधिकारी आणि पाच कर्मचाऱ्यांचा समावेश करण्यात आला आहे.

या अत्यंत संवेदनशील प्रकरणातील सर्व पुरावे, साक्षीदारांचे जबाब, तांत्रिक माहिती आणि गुन्ह्याशी संबंधित इतर महत्त्वाच्या बाबींची सखोल पडताळणी एसआयटीमार्फत करण्यात येणार आहे. तपास जलदगतीने पूर्ण करून लवकरात लवकर न्यायालयात दोषारोपपत्र (चार्जशीट) दाखल करण्याच्या दृष्टीने पोलिसांकडून युद्धपातळीवर प्रयत्न सुरू आहेत.

दरम्यान, या प्रकरणातील आरोपीला न्यायालयाने सात दिवसांची पोलीस कोठडी सुनावली असून, त्याची कसून चौकशी सुरू आहे. गुन्ह्यामागील सर्व बाबींचा उलगडा करण्यासाठी आणि आवश्यक पुरावे संकलित करण्यासाठी तपास यंत्रणा विविध अंगांनी तपास करीत आहे.

हेही वाचा : सामाजिक उद्रेक। ताथवडेतील अल्पवयीन मुलींवरील अत्याचार प्रकरणी सर्वधर्मीय निषेध रॅली!

एसआयटीमध्ये १० सदस्यांचा समावेश

या विशेष तपास पथकामध्ये पाच पोलीस अधिकारी आणि पाच कर्मचाऱ्यांचा समावेश करण्यात आला आहे. एसीपी सुनील कुऱ्हाडे यांच्या नेतृत्वाखाली हे पथक सर्व बाजूंनी तपास करणार आहे.

तांत्रिक पुराव्यांची होणार तपासणी

घटनास्थळावरील पुरावे, सीसीटीव्ही फुटेज, मोबाईल लोकेशन, डिजिटल पुरावे तसेच साक्षीदारांचे जबाब यांची सखोल पडताळणी करण्यात येणार आहे.

आरोपीची कसून चौकशी सुरू

आरोपीला न्यायालयाने सात दिवसांची पोलीस कोठडी सुनावली असून, त्याच्याकडून गुन्ह्याबाबत अधिक माहिती मिळविण्यासाठी पोलिसांकडून विविध अंगांनी चौकशी सुरू आहे.

पीडितेला जलद न्याय देण्यावर भर

या संवेदनशील प्रकरणात पीडितेला लवकरात लवकर न्याय मिळावा यासाठी दोषारोपपत्र वेळेत न्यायालयात दाखल करण्यावर पोलीस प्रशासनाचा भर असल्याचे अधिकाऱ्यांनी सांगितले आहे.

नागरिकांकडून कठोर कारवाईची मागणी

या घटनेमुळे वाकड-ताथवडे परिसरात संतापाचे वातावरण असून, दोषींना कठोर शिक्षा व्हावी, अशी मागणी नागरिकांकडून करण्यात येत आहे.

महाईन्यूज-X वर फॉलो करा : महाईन्यूजला instagram वर फॉलो करा