Ladki Bahin Yojana: लाडक्या बहिणींची प्रतीक्षा संपणार; ऑगस्टचा ₹1500 हप्ता खात्यात जमा होण्यास सुरुवात

मुंबई : मुख्यमंत्री माझी लाडकी बहीण योजनेच्या लाभार्थी महिलांसाठी महत्त्वाची अपडेट समोर आली आहे. ऑगस्ट महिन्याच्या ₹1,500 हप्त्याची प्रतीक्षा करणाऱ्या महिलांच्या खात्यात लवकरच रक्कम जमा होण्याची शक्यता आहे. उपलब्ध माहितीनुसार, हप्ता वितरणाची प्रक्रिया टप्प्याटप्प्याने सुरू करण्यासाठी सरकारकडून आर्थिक आणि प्रशासकीय पातळीवर हालचाली सुरू आहेत.

ऑगस्ट महिन्याच्या हप्त्यासाठी अनुसूचित जाती घटकातील पात्र लाभार्थी महिलांसाठी ₹339.14 कोटींच्या निधी वितरणास मंजुरी देण्यात आल्याची माहिती समोर आली आहे. हा निधी संबंधित विभागाकडे वर्ग करण्यात आल्याने हप्ता वितरणाच्या प्रक्रियेला गती मिळाल्याचे सांगितले जात आहे.

या योजनेअंतर्गत पात्र महिलांना दरमहा ₹1,500 आर्थिक मदत थेट लाभ हस्तांतरणाच्या (DBT) माध्यमातून बँक खात्यात दिली जाते. महिला व बाल विकास विभागाच्या माहितीनुसार, ही योजना थेट लाभ हस्तांतरणावर आधारित आहे.

हेही वाचा –  मुंबई-पुण्यात गणेश विसर्जन मिरवणुकांना उत्स्फूर्त प्रतिसाद; फडणवीस-शिंदेंची उपस्थिती

दरम्यान, ऑगस्ट महिन्याच्या हप्त्याबाबत विविध तारखा आणि दावे समोर आले होते. काही वृत्तांनुसार 24 सप्टेंबरनंतर हप्ता वितरण सुरू होण्याची शक्यता व्यक्त करण्यात आली होती. त्यामुळे आता पात्र महिलांचे लक्ष प्रत्यक्ष बँक खात्यात रक्कम जमा होण्याकडे लागले आहे.

ऑगस्ट हप्त्याच्या वितरणापूर्वी पात्रता, आधार प्रमाणीकरण, ई-केवायसी आणि बँक खात्याशी संबंधित तांत्रिक बाबींची पडताळणी केली जात आहे. त्यामुळे सर्व पात्र लाभार्थींना रक्कम एकाच वेळी न मिळता टप्प्याटप्प्याने जमा होऊ शकते.

महाईन्यूज-X वर फॉलो करा : महाईन्यूजला instagram वर फॉलो करा