सलमानसोबत स्क्रिनवर झळकणार प्रवीण तरडे
मुंबई : सलमान खानचा सिनेमा म्हटलं की त्याचे चाहते तो सिनेमा डोक्यावर घ्यायला तयार असतात. पण आता प्रदर्शनापूर्वीच सलमानचा राधे हा खतरनाक ठरणार आहे. राधेला आता खरी पावर मिळणार आहे. कारण मराठी सिनेमातला पॉवरबाज कलाकार या सिनेमात असणार आहे. याचं कारण असं की राधे या सिनेमामध्ये असणार आहे आपला मराठमोळा लेखक, दिग्दर्शक, अभिनेता प्रवीण तरडे.
गेल्या काही महिन्यांपासून राधे या सिनेमाचं शुटिंग सुरू आहे. सलमान त्याच शूटमध्ये व्यस्त आहे. लॉकडाऊनमुळे या शूटला खीळ बसली आहे. पण असं असलं तरी या सिनेमातला प्रवीण तरडेचा भाग शूट करून झालेला आहे. गेल्या काही महिन्यांपासून प्रवीण आणि सलमान भेट घेत आहेत. मुळशी पॅटर्न हा सिनेमा सलमानला हिंदीत करायचा आहे. त्यासाठी प्रवीण आणि त्याची मिटिंगही झाली.
सिनेमेटोग्राफर महेश लिमये याच्या संदर्भामुळे सलमान आणि प्रवीण यांची ही भेट होऊ शकली असं बोललं जातं. या भेटीमध्ये सलमान आणि प्रवीणचं अनेक मुद्द्यांवर एकमत झालं. त्यातून सलमानने प्रवीणला य सिनेमात काम करणार का असं विचारलं. अर्थात प्रवीणनेही कोणतेही आढेवेढे न घेता होकार दिला. सलमानने दिलेला हा प्रस्ताव नाकारण्याचा प्रश्नच नव्हता. राधे या सिनेमात प्रवीणने मराठी माणसाचीच भूमिका केली आहे.