विभागीय आयुक्तांचे नगरसचिव विभागाकडे पत्र ; राष्ट्रवादी गटनेते पदाचा दत्ता साने उद्या घेणार पदभार

पिंपरी-चिंचवड महापालिकेत राष्ट्रवादी कॉंग्रेसचे 36 नगरसेवक आहेत.  गटनेते पदी दत्ता साने यांची नियुक्ती झाल्याने विरोधी पक्षनेतेही तेच असणार आहेत.  योगेश बहल यांनी आपल्या पदाचा राजीनामा दिल्यानंतर साने यांच्यासह नाना काटे हेही इच्छुक होते. काटे की साने, यावर “राष्ट्रवादी’मध्ये दोन मतप्रवाह होते. अखेर अजित पवार यांनी साने यांच्या नावावर शिक्कामोर्तब केले. त्यानंतर तशी नोंदणी पुण्याच्या विभागीय आयुक्तांकडे नोंदणी करण्यात आली. त्यांच्याकडून गटनेते पदासंर्दभात पत्र नगरसचिव कार्यालयाकडे प्राप्त झाले आहेे. ते पत्र नगरसचिव कार्यालयाने  महापौर नितीन काळजे यांच्याकडे दिले असून उद्या गुरुवारी त्यांची अधिकृत घोषणा होणार आहेत.

चिखली प्रभागातून सलग तिसऱ्यांदा नगरसेवक पदावर दत्ता साने विजयी झाले आहेत. आक्रमक नगरसेवक म्हणून ते परिचित आहेत. आगामी काळात भोसरी विधानसभा मतदारसंघातून “राष्ट्रवादी’च्या वतीने रिंगणात उतरण्याची त्यांची तयारी करत होते. परंतू, त्या अगोदरच त्यांना विरोधी पक्षनेतेपदाची जबाबदारी त्यांच्याकडे सोपविण्यात आली आहे. साने म्हणाले, “”सत्ताधारी भाजपच्या काळात वाढलेल्या भ्रष्टाचाराचा भंडाफोड करणे, हाच मुख्य माझा अजेंडा असेल. राष्ट्रवादीवर नाहक आरोप करून बदनाम करणारा भाजपचा खरा चेहरा जनतेसमोर आणू.” असेही ते म्हणाले.