पुणे|महाईन्यूज|प्रतिनिधी|
स्वातंत्र्यवीर सावरकर वाङ्‌‌मय वक्तृत्व स्पर्धा समितीच्या वतीने देण्यात येणारा यंदाचा ‘जीवनगौरव पुरस्कार’ ज्येष्ठ अभिनेते विक्रम गोखले यांना जाहीर करण्यात आला आहे. येत्या २ फेब्रुवारी रोजी हा पुरस्कार प्रदान करण्यात येणार आहे.
सध्याच्या पिढीला सावरकरांचे साहित्य कळावे, यासाठी स्वा. सावरकर यांच्या जन्मशताब्दीनिमित्त पुण्यात स्वा. सावरकर वाङ्‌‌मय वक्तृत्व स्पर्धा समिती स्थापन करण्यात आली. या समितीच्या वतीने राज्यस्तरीय आंतरमहाविद्यालयीन; तसेच शाळास्तरावर वक्तृत्व स्पर्धा घेण्यात येत आहे. यंदाचे स्पर्धेचे ३७वे वर्ष आहे. स्पर्धेच्या समितीचे संयोजक प्रा. सु. ह. जोशी, किशोर सरपोतदार यांनी पत्रकार परिषदेत माहिती दिली. त्या वेळी विद्याधर नारगोळकर, दिलीप पुरोहित आदी उपस्थित होते.
सावरकर स्पर्धा समितीच्या वतीने गेल्या पाच वर्षांपासून सावरकरांच्या विचारांचे प्रचारक आणि अभ्यासक असलेल्या मान्यवरांना जीवनगौरव पुरस्कार देण्यात येत आहेत. यंदाच्या वर्षी अभिनेते विक्रम गोखले यांना हा पुरस्कार जाहीर करण्यात आला. वक्तृत्व स्पर्धा ही येत्या १ आणि २ फेब्रुवारीला होणार असून, ही स्पर्धा कर्वे रस्त्यावरील आबासाहेब गरवारे महाविद्यालयात होणार आहे; तसेच पुरस्कार आणि पारितोषिक वितरण समारंभ हा २ फेब्रुवारीला होणार आहे.
