‘तोंडी तलाक’ विरोधी पुण्यात गुन्हा दाखल,सार्वजनिक शौचालयात बेकायदा तलाक
पुणे |महाईन्यूज|
सासरच्या मंडळीविरूद्ध कौटुंबिक छळाची तक्रार दाखल केलेल्या महिलेला तिच्या पतीने कोर्टाच्या आवारातील सार्वजनिक शौचालयात बेकायदा तलाक दिला. लष्कर न्यायालयाच्या परिसरात ही घटना घडली. या प्रकरणी लष्कर पोलिस स्टेशनमध्ये ‘तोंडी तलाक’ विरोधी केंद्र सरकारने मंजूर केलेल्या ‘मुस्लिम महिला विवाह अधिकार संरक्षण’ कायद्यानुसार हा गुन्हा दाखल करण्यात आला आहे.
कोंढवा बुद्रुक येथे राहणाऱ्या ३० वर्षीय महिलेने या प्रकरणी तक्रार दिली आहे. त्यानुसार फिर्यादीच्या पतीविरुद्ध गुन्हा दाखल करण्यात आला आहे. फिर्यादीचा पाच वर्षांपूर्वी विवाह झाला होता. विवाह झाल्यावर पती, सासू, सासरे, आणि नणंद यांनी घरगुती कारणावरून; तसेच एटीएम कार्ड परत घेतल्यावरून फिर्यादीला मारहाण केली. सासरच्या मंडळींडून सातत्याने होणारा जाच वाढल्याने फिर्यादीने कोंढवा पोलिस स्टेशनमध्ये सासरच्या मंडळींविरोधात तक्रार दाखल केली. या प्रकरणी सुनावणी लष्कर न्यायालयात सुरू आहे.
सुनावणी सुरू असताना फिर्यादी कोर्टात उपस्थित होती. दरम्यान, ती कोर्टातील सार्वजनिक शौचालयात गेली. त्या वेळी तिच्या पतीने आणि नातेवाइकांनी तिला गाठले. ‘तू आमच्याविरुद्ध गुन्हा दाखल करून चांगले केले नाहीस. आम्हाला काहीही फरक पडत नाही. माझे दुसरे लग्न ठरल्याने मी तुला तलाक देत आहे,’ असे म्हणून फिर्यादीला बेकायदा तलाक दिला. त्यानंतर तेथून जाताना फिर्यादीला शिवीगाळ करून धक्‍काबुक्‍की केली, असे तक्रारीमध्ये म्हटले आहे. त्यावरून पोलिसांनी ‘मुस्लिम महिला विवाह अधिकार संरक्षण’ कायद्यानुसार गुन्हा दाखल केला असून, तपास पोलिस उपनिरीक्षक जी. बी. कुलाळ करत आहेत.
