आमचा बाप काढता आणि समेटाची हाकही देता, याचा अर्थ काय?, एकनाथ शिंदेंचा मुख्यमंत्री उद्धव ठाकरेंना सवाल
मुंबई : गेल्या तीन दिवसांपासून पर्यावरण मंत्री आदित्य ठाकरे आणि शिवसेनेची बुलंद तोफ खासदार संजय राऊत बंडखोर आमदारांवर तुटून पडले आहेत. विविध ठिकाणी होत असलेल्या शिवसेना मेळाव्यांतून आदित्य ठाकरे आणि संजय राऊत बंडखोरांचा खरपूस शब्दात समाचार घेत आहेत. आदित्य ठाकरे आणि राऊतांचे हेच टीकेचे बाण एकनाथ शिंदे यांच्या वर्मी लागले आहेत. याच पार्श्वभूमीवर एकनाथ शिंदे यांनी परत फिरा म्हणणाऱ्या आणि भावनिक आवाहन करणाऱ्या उद्धव ठाकरे यांना सवाल विचारला आहे. “तुमचे पुत्र आणि शिवसेना प्रवक्ते आमचा बाप काढतात आणि आपण समेटाची हाक देतात, याचा अर्थ काय?, असा प्रश्न एकनाथ शिंदे यांनी विचारलाय.
एकनाथ शिंदे यांचा ट्विटमधून मुख्यमंत्र्यांना सवाल
एका बाजूला आपल्या पुत्राने आणि प्रवक्त्याने वंदनीय बाळासाहेबांच्या शिवसैनिकांना डुकरं, नाल्याची घाण, रेडा, कुत्रे, जाहील व मृतदेह म्हणायचे, त्यांचा बाप काढायचा तर दुसऱ्या बाजूला मात्र हिंदूविरोधी मविआसरकार वाचवण्यासाठी याच आमदारांना समेटाची हाक द्यायची, याचा अर्थ काय?, असा सवाल एकनाथ शिंदे यांनी मुख्यमंत्र्यांना विचारला आहे.
एकनाथ शिंदे गेल्या तीन दिवासंपासून दररोज ट्विटमधून उद्धव ठाकरे, संजय राऊत यांच्यावर प्रत्यक्ष, अप्रत्यक्षरित्या निशाणा साधत आहेत. हिंदुत्वापासून फारकत, निधी न मिळाल्याचं कारण, महाविकास आघाडीचा भ्रष्टाचार, मुख्यमंत्री भेटीसाठी वेळ देत नसल्याचं कारण, काँग्रेस राष्ट्रवादीचा सेना आमदारांना होत असलेला त्रास, अशा कारणांतून शिवसेनेच्या आमदारांनी बंड केल्याचं एकनाथ शिंदे ट्विटमधून सूचित करत आहेत.
