वायफळजवळ असलेल्या कुरझडी फोर्ट येथील कुऱ्हा लघु सिंचन प्रकल्पाच्या पाळीला १५ ठिकाणी तडे गेल्याचे प्रशासनाच्या पाहणीत समोर

रसुलबाद मार्गालगत कुरझडी फोर्ट गावाजवळ यशोदा नदीच्या उगमस्थानावर हा कुऱ्हा तलाव आहे. या तलावाचे काम १९८३मध्ये पूर्ण झाले होते. १.८७ दशलक्ष घनमीटर इतकी या तलावाची क्षमता आहे. १०.५५ मीटर उंची असलेला हा तलाव ‘क’ वर्गात मोडतो. एक किलोमीटर लांबीची पाळ तलावाला बांधण्यात आली आहे. या पाळीला तडे गेल्याचे निदर्शनास आले. गावकऱ्यांनी लगेच प्रशासनाला कळविले. याच दोन दिवसांत अतिवृष्टी होऊन पिचिंगच्या वर अडीच फूट पाणी वाहत होते. पाण्याचा वेग पाहता भीतीदायक चित्र निर्माण झाले. धरणावरील मच्छिमार, कालवा निरीक्षक आणि पाणी वापर संस्थेच्या सदस्याने लगेच सिंचन विभागाचे उपअभियंता अविनाश दसेवाल यांना सूचना दिल्या. तत्काळ दसेवाल यांनी तलाव गाठून पाण्याचा विसर्ग सुरू केला. यशोदा नदीची पाणी पातळी वाढल्याने कुरझडी फोर्ट, बारा सोनेगाव या गावात दवंडी देण्यात आली. वर्ध्याचे तहसीलदार रमेश कोळापे यांनी सिंचन विभागाला सोबत घेऊन गावाला भेट दिली. सतर्कता म्हणून अवघे गाव रात्रभर जागे होते, असे रोशन पेटकर आणि संतोष भोयर यांनी सांगितले. तर सतत भेगा का पडत आहेत याची कारणेदेखील शोधणे आवश्यक असल्याचे मणसांगिर महाराज पाणी वापर संस्थेचे शंकर मानकर यांनी सांगितले.

गावकऱ्यांच्या मागण्या

– सुमारे साडेपाचशे हेक्टरवर सिंचन क्षमता

– प्रकल्पाची उंची वाढविण्या यावी

– क मधून ब वर्ग दर्जात विकसित करावे

धोका तरीही उपाय तात्पुरते

प्रकल्पापासून एक किलोमीटरवर असलेले बारा सोनेगाव हे गाव आधीही स्थलांतरित करण्यात आले होते. प्रकल्पाची पाळ दुभंगण्याची स्थिती असल्याने हा निर्णय घेण्यात आला होता. तर अडीच हजार लोकवस्ती असलेल्या कुरझडी फोर्ट या गावातून यशोदा नदी वाहते. तलावाचे पाणी यशोदा नदीत सोडण्यात येते. त्यामुळे तलावाला काही झाले तर त्याचा प्रत्यक्ष परिणाम कुरझडी फोर्ट या गावावर होणार हे निश्चित आहे.