पवार, गडकरींप्रमाणे आंबेडकरी नेत्यांनाही डी.लिट. पदवी द्या, रिपाइं आक्रमक
औरंगाबाद: राष्ट्रवादीचे अध्यक्ष शरद पवार आणि केंद्रीय मंत्री नितीन गडकरी यांना डॉ. बाबासाहेब आंबेडकर मराठवाडा विद्यापीठाकडून डी.लिट. पदवी देण्याच्या हालचाली सुरू आहेत. यावरून रिपाइं आक्रमक झाल्याचे पाहायला मिळत असून अशा पद्धतीने पदव्या वाटप आक्षेपार्ह असून वाटपच करायच्या असतील तर त्याच दिवशी नामांतर लढाईतील आंबेडकरी नेते प्रकाश आंबेडकर, रामदास आठवले, गंगाधर गाडे यांनाही पदवी देण्यात यावी, अन्यथा आंदोलन छेडण्याचा इशारा रिपाइंकडून देण्यात आला आहे.
काही दिवसांपूर्वीच विद्यापीठ व्यवस्थापन परिषदेच्या बैठकीत शरद पवार आणि नितीन गडकरी यांना डी. लिट. पदवी देण्याबाबत निर्णय घेतला होता. दोन्ही मान्यवरांसह नामांतराच्या लढाईत अग्रेसर असलेल्या रामदास आठवले, गंगाधर गाडे, जोगेंद्र कवाडे, या नेत्यांनाही विद्यापीठ प्रशासनाने पदवी देऊन सन्मानित करावे, अशी मागणी आता रिपब्लिकन पार्टी ऑफ इंडियाचे मराठवाडा युवक अध्यक्ष नागराज गायकवाड यांनी केली आहे.
ज्या दिवशी राष्ट्रवादीचे अध्यक्ष शरद पवार आणि केंद्रीय मंत्री नितीन गडकरी यांना विद्यापीठाकडून डी.लिट. पुरस्कार प्रदान करण्यात येईल त्याच दिवशी आंबेडकरी नेत्यांना देखील पदवीने सन्मानित करण्यात यावे, अन्यथा समारंभाच्या ठिकाणी रिपाइंच्या वतीने आंदोलन छेडण्यात येईल असा इशारा नागराज गायकवाड यांनी दिला आहे.
उस्मानाबाद येथे स्वतंत्र विद्यापीठाची मागणी करणाऱ्यांवर शाईफेक
