‘… तर आणि तरच धार्मिक स्थळांना मिळणार भोंग्यांसाठी परवानगी’; पालिका आयुक्तांनी केले स्पष्ट

सोलापूर शहरातील दहा टक्के मंदिरांनी, तर पन्नास टक्के मशिदींनी लाऊडस्पीकर लावण्यासाठी परवानगी मागितली आहे. शहरात जवळपास सहाशे धार्मिक स्थळे आहेत. या धार्मिक स्थळांमध्ये ३५९ मंदिरांपैकी ३१ मंदिरांनी लाऊडस्पीकर लावण्याची परवानगी मागितली आहे. तर एकूण १९२ मशिदींपैकी ९० मशिदींनी लाऊडस्पीकरसाठी परवानगी मागितली आहे. शिवाय शहरात २ गुरुद्वारा ,१८ चर्च आणि ३० बुद्धविहारांचा समावेश आहे.

दरम्यान, पोलीस आयुक्तालयात झालेल्या शांतता कमिटीच्या बैठकीत परवानगी देण्याबाबच चर्चा करण्यात आली. त्या चर्चेत परवानगी देताना ज्या धार्मिक स्थळांकडे बांधकाम परवाना आहे अशांनाच भोंगे अथवा लाऊडस्पीकरसाठी परवानगी देण्यात येईल यावर भर देण्यात आला. तसेच आवश्यकतेनुसार वफ बोर्ड यांच्याकडील नोंदणीकृत व धर्मदाय आयुक्त कार्यालयात नोंदणीकृत संस्थानाच परवानगी देण्यात येणार असल्याचेही या बैठकीत स्पष्ट करण्यात आले आहे.

पालिका प्रशासन आणि पोलिसांनी स्पष्ट केले आहे. त्यामुळे आता शहरातील विनापरवाना म्हणजे अनधिकृत धार्मिक स्थळांचा मुद्दा नव्याने चर्चेला आला आहे. त्यात महानगरपालिकेला नगररचना विभाग, अतिक्रमण विभाग आणि पोलीस काय भूमिका घेतात याकडे सर्वांचे लक्ष लागले आहे.