“सेनेच्या पवारांना आस्मान दाखवण्याची रणनीती ठरली, व्यवस्था झाली, फडणवीसांनी प्लॅन सांगितला”
मुंबई : “शिवसेनेच्या संजय पवार यांना आस्मान दाखविण्याची सगळी तयारी झाली आहे. आजच्या बैठकीत त्याबद्दलची सगळी रणनीती ठरली आहे. राज्यसभा निवडणूक आणि मतदानादरम्यान कोण-कोणत्या गोष्टी करायच्या आहेत हे देवेंद्र फडणवीस सांगितलं आहे. नियोजनानुसार आमचा तिसरा उमेदवार धनंजय महाडिक जिंकून येणारच, आम्ही संजय पवार यांना आस्मान दाखवू”, असा आत्मविश्वास भाजप नेते आमदार आशिष शेलार यांनी व्यक्त केला. राज्यसभेच्या दृष्टीने भाजपच्या महत्त्वापूर्ण बैठकीनंतर शेलारांनी माध्यमांशी संवाद साधला.
राज्यसभेच्या ६ जागांसाठी ७ उमेदवार रिंगणात असल्याने निवडणुकीत मोठी चुरस बघायला मिळते आहे. महाविकास आघाडी आणि भाजप एक एक मतासाठी प्रत्येक आमदाराच्या कनेक्टमध्ये आहे. अशातच राज्यसभा निवडणुकीची रणनिती ठरविण्यासाठी भाजपची महत्त्वपूर्ण बैठक पार पडली. कोरोनाची लागण झालेली असूनही देवेंद्र फडणवीस यांनी या बैठकीला ऑनलाईन हजेरी लावली. या बैठकीत भाजपने राज्यसभी सगळी रणनीती आखली तसेच आमदारांची जुळवाजुळव देखील केल्याचं आशिष शेलार यांनी सांगितलं.
“आजच्या बैठकीत देवेंद्र फडणवीस यांनी मार्गदर्शन केलं. राज्यसभा निवडणुकीचा सर्व आढावा, व्यवस्था, रणनीती आणि कार्यपद्धती याविषयीची ब्लू प्रिंट आमची तयार आहे. भाजपचा सहावा उमेदवार म्हणजे धनंजय महाडिक नक्की जिंकून येणार. म्हणजेच शिवसेनेच्या संजय पवार यांचा नक्की पराभव होणार”, असा विश्वास आशिष शेलार यांनी बोलून दाखवला.
फडणवीसांचं ठरलं, सेनेच्या संजय पवारांना आस्मान दाखवायचं
भाजपचे निवडणूक प्रभारी अश्विनी वैष्णव, विरोधी पक्षनेते देवेंद्र फडणवीस, भाजप प्रदेशाध्यक्ष चंद्रकांत पाटील तसेच भाजप नेते आमदार आशिष शेलार या चौघांमध्ये ही विशेष बैठक पार पडली. या बैठकीमध्ये राज्यसभा निवडणुकीच्या अनुषंगाने महत्त्वाची रणनिती ठरली. तसेच आमदारांची जुळजुळव देखील झाल्याचं सांगून शेलारांनी सत्ताधारी महाविकास आघाडीचं टेन्शन वाढवलं आहे.
