ताज्या घडामोडी पाटी-पुस्तक पिंपरी / चिंचवड

पिंपरी-चिंचवडच्या कन्यांची आशियाई तिरंदाजी स्पर्धेकडे विजयी झेप!

भारतीय संघात स्वराज्य तिरंदाजी अकादमीच्या ४ खेळाडूंची दमदार निवड; शहराच्या शिरपेचात मानाचा तुरा

Vaishnav Jadhav5 seconds ago

0 10,000 1 minute read

Pimpri-Chinchwad girls make a triumphant leap towards the Asian Archery Championship

 पिंपरी-चिंचवड | विशेष प्रतिनिधी

“जिद्द, चिकाटी आणि अथक परिश्रम यांच्या बळावर यशाचे सुवर्णलक्ष्य गाठता येते,” याची प्रचिती पुन्हा एकदा पिंपरी-चिंचवडच्या गुणी मुलींनी आपल्या उल्लेखनीय कामगिरीतून करून दिली आहे. पिंपळे गुरव येथील सह्याद्री स्पोर्ट्स फाउंडेशन संचलित ‘स्वराज्य तिरंदाजी अकादमी’तील चार होतकरू तिरंदाज मुलींनी युएई (UAE) येथे होणाऱ्या आगामी आशियाई युवा तिरंदाजी अजिंक्यपद (Asian Youth Championship) स्पर्धेसाठी भारतीय संघात स्थान मिळवले आहे. या अभूतपूर्व यशामुळे शहराच्या क्रीडा जगतातून त्यांच्यावर कौतुकाचा वर्षाव होत आहे.

विविध गटांतून ‘या’ खेळाडूंची झाली निवड:

राष्ट्रीय स्तरावरील सातत्यपूर्ण आणि उत्कृष्ट कामगिरीच्या जोरावर या चारही खेळाडूंनी भारतीय संघात मानाची निवड मिळवली आहे:

कु. धारा मानसी अमोल बिडकर (सब ज्युनियर कंपाऊंड गट)

कु. वैदेही जाधव (सब ज्युनियर कंपाऊंड गट)

कु. श्रावरी शेंडे (ज्युनियर रिकर्व गट)

कु. प्रियांका प्रसाद (ज्युनियर कंपाऊंड गट)

कुशल मार्गदर्शन अन् राजकीय लोकप्रतिनिधींचे पाठबळ

हेही वाचा

भारतीय पासपोर्टची रँकिंग घसरली, पहिल्या १०० देशांच्या यादीतून बाहेर

या दैदिप्यमान यशामागे खेळाडूंच्या अथक परिश्रमांसोबतच त्यांचे प्रशिक्षक श्री. कुणाल तावरे यांचे कुशल मार्गदर्शन आणि दूरदृष्टीचे मोलाचे योगदान आहे. तावरे यांच्या मार्गदर्शनाखाली यापूर्वीही अनेक खेळाडूंनी राष्ट्रीय आणि आंतरराष्ट्रीय स्तरावर आपली वेगळी ओळख निर्माण केली आहे.

याशिवाय, सह्याद्री स्पोर्ट्स फाउंडेशनला दर्जेदार क्रीडा मैदान उपलब्ध करून देण्यासाठी या प्रभागातील सर्व नगरसेवकांनी मोलाचे सहकार्य केले. तसेच, आमदार श्री. शंकरशेठ जगताप आणि श्री. महेशभाऊ लांडगे यांनी मैदान उपलब्ध करून देण्याबरोबरच तिथे राष्ट्रीय दर्जाच्या क्रीडा सुविधा उभारण्यासाठी विशेष प्रयत्न केले. आधुनिक सुविधा आणि उत्कृष्ट सरावाचे वातावरण लाभल्यामुळेच खेळाडूंना आपल्या गुणवत्तेचा सर्वोत्तम आविष्कार करता आला, असे समाधान खेळाडूंचे पालक डॉ. अमोल बिडकर, डॉ. शेंडे, श्री. गावडे, श्री. प्रसाद आणि श्री. जाधव यांनी व्यक्त केले आहे.

महाराष्ट्राच्या क्रीडाविश्वात आनंदाचे वातावरण

या यशामुळे पिंपरी-चिंचवड शहरासह संपूर्ण महाराष्ट्राच्या क्रीडाविश्वात आनंदाचे व अभिमानाचे वातावरण निर्माण झाले आहे. आगामी आशियाई युवा अजिंक्यपद स्पर्धेतही या चारही कन्या भारतीय तिरंग्याचा गौरव उंचावत देशासाठी पदकांची मोठी कमाई करतील, असा ठाम विश्वास क्रीडाप्रेमी आणि नागरिकांकडून व्यक्त केला जात आहे.