‘एका झटक्यात इराणचं संपूर्ण नेतृत्व संपवू शकतो, पण..’; डोनाल्ड ट्रम्प यांचा नवा इशारा
Donald Trump | अमेरिका आणि इराणमधील वाढता तणाव आता एका नव्या टोकाला पोहोचला आहे. “अमेरिकेने ठरवलं तर ते केवळ एका झटक्यात इराणच्या उर्वरित नेतृत्वाला संपवू शकतात,” असा थेट आणि गंभीर इशारा अमेरिकेचे राष्ट्राध्यक्ष डोनाल्ड ट्रम्प यांनी दिला आहे. नुकत्याच झालेल्या अमेरिका-इस्रायलच्या संयुक्त हवाई हल्ल्यात इराणचे सर्वोच्च नेते अयातुल्ला अली खामेनी मारले गेले होते. त्यानंतर त्यांच्या अंत्यसंस्कारासाठी जमलेल्या इराणच्या वरिष्ठ नेत्यांना लक्ष्य करत ट्रम्प यांनी हे विधान केले आहे.
‘Axios’ या वृत्तवाहिनीला दिलेल्या मुलाखतीत ट्रम्प यांनी हे वक्तव्य केले. मात्र, अमेरिकेला इराणसोबत तडजोड आणि वाटाघाटी करायच्या असल्याने आपण सध्यातरी असे पाऊल उचलणार नसल्याचे त्यांनी स्पष्ट केले.
“चर्चा करायला कोणी शिल्लक राहणार नाही”
इराणमध्ये सध्या अयातुल्ला अली खामेनी यांच्या पार्थिवावर आठवडाभर चालणारे राज्य अंतिम संस्कार सुरू आहेत. यासाठी देशातील सर्वच वरिष्ठ नेते एकाच ठिकाणी जमले आहेत. यावर भाष्य करताना ट्रम्प म्हणाले, “ते सर्व नेते सध्या तिथे एकाच ठिकाणी उपस्थित आहेत. एकाच झटक्यात आम्ही त्या सर्वांना संपवू शकतो, पण आम्ही तसं करणार नाही. कारण जर आम्ही त्यांना संपवलं, तर आमच्याकडे पुढे वाटाघाटी (चर्चा) करण्यासाठी कोणीही शिल्लक राहणार नाही.”
हेही वाचा
केंद्र आणि राज्याच्या धोरणांमुळे सहकार क्षेत्राला नवे बळ; मुख्यमंत्री देवेंद्र फडणवीस यांचा विश्वास
नागरिकांच्या अश्रूंवर ट्रम्प यांचा संशय
अंतिम संस्काराच्या वेळी काही इराणी नागरिक रडत असल्याचं पाहून ट्रम्प यांनी आश्चर्य व्यक्त केले. “इराणमधील लोकांना अली खामेनींचा तिरस्कार वाटत असावा असं मला वाटत होतं. त्यामुळे अंतिम संस्काराच्या वेळी लोकांच्या डोळ्यात आलेले हे अश्रू कदाचित बनावट असू शकतात,” असा संशयही ट्रम्प यांनी व्यक्त केला.
“इराण तडजोडीसाठी आसुसलाय”
अमेरिकन स्वातंत्र्यदिनाच्या पूर्वसंध्येला बोलताना ट्रम्प यांनी इराणची थट्टा उडवली होती. “आम्हाला इराणवर मोठा विजय मिळाला आहे. ते आता तडजोड करण्यासाठी आसुसलेले आहेत. त्यांना अत्यंत वाईट पद्धतीने करार करायचा आहे. आम्ही केवळ मानवता दाखवून त्यांना अंत्यसंस्कारासाठी एका आठवड्याची सुट्टी दिली आहे,” असा टोला ट्रम्प यांनी लगावला.
इराणचे चोख प्रत्युत्तर: “तुमच्याकडे संस्कृतीच नाही”
डोनाल्ड ट्रम्प यांच्या या वादग्रस्त विधानानंतर इराणनेही त्यांना जशास तसे उत्तर दिले आहे. आर्मेनियामधील इराणच्या दूतावासाने ‘X’ (ट्विटर) वर एक पोस्ट शेअर करत ट्रम्प यांच्यावर जोरदार निशाणा साधला. इराणने म्हटले आहे की, “तुम्हाला या भावना आणि गोष्टी कधीच समजणार नाहीत. कारण तुमच्याकडे ना संस्कृती आहे, ना इतिहास, आणि ना सन्मान!”
महाईन्यूज-X वर फॉलो करा : महाईन्यूजला instagram वर फॉलो करा
