मुंबईतील घाटकोपर येथील ऑर्किड टॉवर इमारतीला भीषण आग

मुंबई : मुंबईतील घाटकोपर येथील एका इमारतीला भीषण आग लागल्याची घटना घडली आहे. घाटकोपर येथील ऑर्किड टॉवर येथे ही भीषण आग लागल्याची माहिती आहे. ऑर्किड टॉवरच्या बिल्डिंग नंबर सहाच्या चौथ्या मजल्यावरील फ्लॅटमध्ये ही आग लागली आहे. घटनेची माहिती मिळताच अग्निशमन दलाच्या चार गाड्या घटनास्थळी दाखल झाल्या असून आग विझवण्याचे शर्थीचे प्रयत्न सुरु आहेत.

अग्निशमन दलाच्या गाड्या, पोलीस घटनास्थळी दाखल

अग्निशमन दलाच्या गाड्या, पोलीस, सार्वजनिक बांधकाम विभागाचे अधिकारी, अदानी वीज कर्मचारी, स्थानिक वॉर्ड कर्मचारी आणि रुग्णवाहिका घटनास्थळी दाखल झाल्या आहेत. अद्याप या घटनेत कोणतीही जीवितहानी झाल्याची माहिती नाही. आगीचे कारण अद्याप समजू शकलेले नाही.

हेही वाचा –  ‘शेजारी देश सरळ वागतीलच असे गृहित धरु नये’; परराष्ट्र मंत्री एस. जयशंकर यांचे वक्तव्य

घाटकोपर पश्चिम येथील ऑर्किड टॉवर येथील इमारतीला ही आग लागली आहे. या इमारतीच्या चौथ्या मजल्यावरील फ्लॅटमध्ये ही आग लागल्याची माहिती आहे. या फ्लॅटमध्ये राहणाऱ्या कुटुंबाला बाहेर काढण्यासाठी सध्या अग्निशमन दलाचे जवान आणि पोलीस प्रयत्न करत आहेत. आगीचा भडका मोठ्या प्रमाणात असल्याने या ठिकाणी अग्निशमन दलाच्या चार गाड्या घटनास्थळी दाखल झाल्या असून आगीवर नियंत्रण मिळवण्याचे प्रयत्न सुरु आहेत.

यावेळी इमारतीच्या चौथ्या मजल्यावरील ज्या फ्लॅटमध्ये ही आग लागली त्या फ्लॅटच्या खिडकीतून मोठ्या प्रमाणात आगीच्या ज्वाळा निघताना दिसत होत्या. त्यामुळे ही आग किती भीषण असेल याचा अंदाज लावता येऊ शकतो. या फ्लॅटमध्ये कोण राहते, सध्या घरात किती लोक आहेत आणि ही आग नेमकी कशामुळे लागली, याबाबत सध्या काहीही माहिती मिळू शकलेली नाही. सध्या पोलीस आणि अग्निशमन दलाचे जवान या आगीवर नियंत्रण मिळवून घरातील लोकांना सुखरुप बाहेर काढण्याचे प्रयत्न करत आहेत. तसेच, ही आग अजून पसरु नये, याचीही काळजी घेतली जात आहे. तरी या घटनेने ऑर्किड टॉवर परिसरातील लोकांमध्ये भीतीचं वातावरण पसरलं आहे.

महाईन्यूज-X वर फॉलो करा : महाईन्यूजला instagram वर फॉलो करा