लालबागच्या राजाची शेवटची आरती संपन्न

मुंबई : गेले दहा दिवस भक्तिभावाने लाडक्या गणरायाची सेवा, आराधना केल्यानंतर आज त्यांना जड अंतःकरणाने निरोप देण्यात येत आहे. एकीकडे गणपती बाप्पाची आराधना करणाऱ्या सर्वच गणेशभक्तांचे डोळे आज पाणावले आहेत तर दुसरीकडे पुढच्या वर्षी लवकर या असा जयघोष करत लाडक्या बाप्पाच्या आगमनाची प्रतिक्षा आतापासूनच केली जात आहे.

दरम्यान, मुंबईतील लालबागच्या राजाच्या विसर्जन मिरवणुकीची लगबगही पाहायला मिळत आहे. यापूर्वी लालबागच्या राजाची शेवटची आरती संपन्न झाली आहे. गणपती बाप्पाला आज निरोप दिला जाणार आहे. विसर्जन मिरवणुकीआधी लालबागच्या राजाची शेवटची आरती करण्यात आली. यावेळी भाविक भक्तांनी एकच मोठी गर्दी केल्याचे पाहायला मिळाले. तर आपल्या लाडक्या राजाची आरती करताना काही भाविकांच्या डोळ्यात अश्रू तरळतांना पाहायला मिळाले. तर सोमवारी सकाळी ६ वाजल्यापासून लालबागच्या राजाच्या दर्शनासाठी भाविकांची रांग बंद करण्यात आली होती तर मध्यरात्री १२ वाजल्यापासून मुखदर्शन रांग बंद करण्यात आले होते. विसर्जनाच्या तयारीसाठी हा निर्णय घेण्यात आला आहे.