‘मालवण’ युद्धनौका भारतीय नौदलात दाखल; स्वदेशी संरक्षण क्षमतेला मोठी चालना
INS Malvan Warship | कोची येथील कोचीन शिपयार्ड लिमिटेडने बांधलेली दुसरी पाणबुडीविरोधी युद्धनौका ‘मालवण’ भारतीय नौदलाच्या ताफ्यात सामील झाली आहे. ‘आत्मनिर्भर भारत’ उपक्रमांतर्गत स्वदेशी संरक्षण उत्पादनांना चालना देण्याच्या दिशेने हे एक महत्त्वाचे पाऊल मानले जात आहे. ३१ मार्च रोजी ही अत्याधुनिक युद्धनौका औपचारिकरित्या नौदलाच्या स्वाधीन करण्यात आली. नौदलाला अशा एकूण आठ अँटी-सबमरीन युद्धनौका मिळणार असून, त्यापैकी ही दुसरी युद्धनौका आता सेवेत दाखल झाली आहे.
‘मालवण’ हे नाव महाराष्ट्रातील ऐतिहासिक किनारपट्टी शहर मालवण यावरून देण्यात आले आहे. हा प्रदेश छत्रपती शिवाजी महाराजांच्या गौरवशाली सागरी परंपरेशी जोडलेला आहे. तसेच ही युद्धनौका पूर्वीच्या ‘आयएनएस मालवण’ या भारतीय नौदलाच्या सुरुंग शोधक जहाजाचा वारसाही पुढे चालवत आहे. हे जुने जहाज २००३ पर्यंत सेवेत होते. अशा प्रकारे, प्रतिष्ठित युद्धनौकांची नावे जतन करण्याची नौदलाची परंपरा या जहाजाद्वारे कायम ठेवण्यात आली आहे.
हेही वाचा : पॅन कार्डसाठी नवे कडक नियम लागू; ‘ही’ कागदपत्रे असतील तरच मिळणार नवीन पॅन कार्ड
सुमारे ८० मीटर लांबी आणि १,१०० टन विस्थापन क्षमता असलेली ही युद्धनौका पाण्याखाली पाळत ठेवणे, किनारपट्टीजवळील पाण्यात पाणबुडीविरोधी युद्धमोहिमा (ASW) राबवणे, कमी तीव्रतेच्या सागरी कारवाया आणि सुरुंग युद्धक्षमता यांसाठी सज्ज आहे. या जहाजावर टॉर्पेडो, बहुउद्देशीय पाणबुडीविरोधी रॉकेट्स तसेच प्रगत रडार आणि सोनार प्रणालींसह अत्याधुनिक सेन्सर्स बसवण्यात आले आहेत. शत्रूच्या पाणबुड्यांचा शोध घेणे आणि त्यांना निष्क्रिय करण्यात सक्षम असलेल्या ‘मालवण’मुळे भारतीय नौदलाची ताकद आणखी वाढणार आहे.
संरक्षण मंत्रालयाच्या माहितीनुसार, ८० टक्क्यांहून अधिक स्वदेशी घटकांचा समावेश असलेली ‘मालवण’ ही युद्धनौका स्वदेशी युद्धनौका बांधणी क्षेत्रातील एक महत्त्वाचा टप्पा ठरली आहे. या प्रकल्पात देशातील सूक्ष्म, लघु आणि मध्यम उद्योगांनी (MSME) तयार केलेली उपकरणे आणि प्रणाली वापरण्यात आल्याने ‘आत्मनिर्भर भारत’ या धोरणाला बळ मिळाले असल्याचेही मंत्रालयाने नमूद केले आहे.
महाईन्यूज-X वर फॉलो करा : महाईन्यूजला instagram वर फॉलो करा
