अंबाबाई आणि जोतिबा मंदिरात ड्रेस कोड लागू

कोल्हापूर : अंबाबाई, जोतिबा मंदिरात भाविकांसाठी आता ड्रेसकोड लागू करण्यात आला आहे. दर्शनासाठी येणाऱ्या भाविकांना मंदिर परिसरात तोकडे कपडे घालून येण्यास मनाई करण्यात येणार आहे. पश्चिम महाराष्ट्र देवस्थान समितीने याबाबत प्रसिद्धीपत्रक जाहीर करत भाविकांना सुचनाचे पालन करुन सहकार्य करण्याचे आवाहन केले आहे. अंबाबाई आणि जोतिबा मंदिरात ड्रेस कोड लागू, पश्चिम महाराष्ट्र देवस्थान समितीचा मोठा निर्णय अंबाबाई आणि जोतिबाच्या दर्शनासाठी भाविकांची मोठी गर्दी असते. सुट्टी अन् सणासुदीच्या काळात राज्यभरातील भाविक अंबाबाई, जोतिबाच्या दर्शनासाठी येत असतात. याआधी भाविक जीन्स अन् वेगवेगळा पेहराव करुन मंदिरात प्रवेश करत होते. मात्र यापुढे तोकडे कपडे न घालता, पारंपारीक पध्दतीने कपडे परिधान करावे लागणार आहेत.

हेही वाचा   :  महाराष्ट्रात अवकाळी पावसाचा जोर; मुंबई, पुण्यासह अनेक जिल्ह्यांना यलो आणि ऑरेंज अलर्ट 

देवस्थान समितीने दिलेल्या प्रसिद्धीपत्रकात म्हटले आहे की, करवीर निवासिनी अंबाबाई देवस्थान तसेच केदारलिंग (जोतिबा) देवस्थान वाडी रत्नागिरी ता. पन्हाळा येथे काही भाविक दर्शनासाठी येताना तोकडे कपडे परिधान करुन मंदिरामध्ये प्रवेश करतात. काही मंदिरामध्ये दर्शनासाठी भाविकांसाठी ड्रेसकोड करणेत आलेला आहे. करवीर निवासिनी देवस्थान हे साडेतीन शक्तीपीठापैकी एक शक्तीपीठ असून या मंदिराचे महत्व फार आहे.

तरी मंदिरामध्ये भाविकांनी दर्शनास तसेच धार्मिक विधीच्या अनुषंगाने येताना तोकडे कपडे न घालता, पारंपारीक पध्दतीने कपडे परिधान करावे, मंदिरामध्ये धार्मिकतेचा आदर करुन व त्याचे पालन करुन पुरुष व महिला भक्तांनी कपडे परिधान करावे आणि सुचनाचे पालन करुन देवस्थान व्यवस्थापन समितीस सहकार्य करावे, असे आवाहन देवस्थान समितीतर्फे करण्यात आले आहे.

महाईन्यूज-X वर फॉलो करा : महाईन्यूजला instagram वर फॉलो करा