अमरावतीः शहरातील युनियन बँकेच्या ५९ लॉकरमधील साडेतीन कोटी रुपयांचे सुमारे साडेपाच किलो सोन्याचे दागिने बदलण्यात आल्याची बाब ऑडिटमधून पुढे आली आहे. अत्यंत सुरक्षित मानल्या जाणाऱ्या बँकेच्या स्ट्राँग रूममधील लॉकरमध्ये ठेवलेले सोन्याचे दागिने कसे गायब झाले, बनावट दागिने कुणी ठेवले, याचा शोध आता बँक प्रशासन आणि पोलिसांकडून घेतला जात आहे.
आंचल विहार येथील उज्ज्वल मळसने यांनी राजापेठ येथील युनियन बँक ऑफ इंडियामध्ये दागिने गहाण ठेवले होते. गहाण सोडविण्यासाठी मळसने हे बँकेत गेले असता त्यांच्या शंभर ग्रॅम सोन्याऐवजी बनावट दागिने देण्याचा प्रयत्न झाला. त्यामुळे त्यांनी पोलिसांत तक्रार दाखल केली. यानंतर आणखी दोन तक्रारी आल्याने राजापेठ पोलिसांनी बँक व्यवस्थापनाला नोटीस बजावून अहवाल मागितला. बँकेने तातडीने आपल्या स्तरावर सर्व लॉकरचे ऑडिट करण्यास सुरुवात केली. हा अहवाल बुधवारी सादर करण्यात आला. या अहवालानुसार, बँकेत एकूण ९२ लॉकरची सोय उपलब्ध आहे. यातील तीन लॉकर रिकामे असून तब्बल ५९ लॉकरमधील ५ किलो ८०० ग्रॅम सोन्याचे दागिने बदलविण्यात आल्याचे स्पष्ट झाले आहे. २६ लॉकरमधील दागिने सुरक्षित असल्याचा दावाही बँकेने केला आहे.
बँक व्यवस्थापनानेच दागिने बदलण्यात आल्याची माहिती दिल्याने ग्राहकांमध्ये अस्वस्थता निर्माण झाली आहे. सध्या आठ लॉकरमधील दागिने आणि कागदपत्रांची छाननी सुरू आहे. बँक व्यवस्थापनाने सध्या कोणाचीही जबाबदारी निश्चित केलेली नाही.
आर्थिक गुन्हे शाखा करणार चौकशी
‘युनियन बँकेच्या तारण दागिने प्रकरणाची चौकशी अजून सुरू झालेली नाही. हे प्रकरण आर्थिक गुन्हे शाखेकडे पाठविण्यात आल्याचे सांगितले जात असले तरी अजून आलेले नाही. प्रकरण आमच्याकडे आल्यानंतर चौकशी करण्यात येणार आहे,’ अशी माहिती आर्थिक गुन्हे शाखेचे पोलिस निरीक्षक शिवाजी बचाटे यांनी दिली.
