जळगाव : जळगाव येथून पुण्याला जाणाऱ्या प्रवाशांची संख्या लक्षात घेता सोमवारपासून पुणे विमानसेवा सुरू होणार आहे. गेल्या महिन्यात गोवा जळगाव हैदराबाद अशी विमानसेवा फ्लाय ९१ विमान कंपनीने सुरू केली. या सेवेला प्रवाशांचा चांगला प्रतिसाद मिळाल्यानंतर पुणे येथेही विमानसेवा सुरू होणार आहे.
विमानतळावरून गेल्या महिन्यात गोवा जळगाव हैदराबाद अशी विमानसेवा फ्लाय ९१ या विमान कंपनीने सुरू केली. या विमान सेवेला चांगल्या प्रतिसाद मिळत असून पुणे विमान सेवा सुरू करण्याबाबत देखील जळगावकरांची मागणी होती. त्यानुसार विमान कंपनीने पुणे येथे जाणाऱ्या प्रवाशांची संख्या लक्षात घेता सोमवार २७ मे पासून पुणे येथे विमान सेवा सुरू केली आहे. ही सेवा आठवड्यातून चार दिवस राहणार आहे.
भारत सरकारच्या नागरी उड्डाण मंत्रालयाच्या मान्यतेनुसार उड्डाण ५.० योजनेअंतर्गत जळगाव विमानतळावरून फ्लाय ९१ विमान कंपनीने विमानसेवा सुरू केली आहे. १८ एप्रिल पासून गोवा हैदराबादला विमानसेवा सुरू केली आहे. तसंच जळगाव पुणे विमानसेवा देखील सुरू करावी अशी मागणी व्यापारी तसंच नागरिकांकडून करण्यात आली होती.
विमान कंपनीने २५ आणि २६ रोजी जळगाव ते पुणे अशी विमानसेवा दोन दिवस ट्रायल बेसवर घेण्याचा निर्णय घेतला. त्यानुसार गोव्यावरून जळगावला तर जळगाव वरून पुण्याला आणि पुण्यावरून जळगाव आणि नंतर गोव्याला विमानाने शुक्रवारी उड्डाण केले.
महाराष्ट्र चेंबर ऑफ कॉमर्सच्या पाठपुरास यश
महाराष्ट्र चेंबर ऑफ कॉमर्स अँड इंडस्ट्रीचे अध्यक्ष ललित गांधी आणि त्यांचं शिष्टमंडळ हे दीड वर्षापासून जळगाव ते पुणे गोवा हैदराबाद अहमदाबाद मुंबई इंदोर आधी ठिकाणी विमान सेवा सुरू करण्याबाबत प्रयत्न करत होते. नागरिक उड्डाण मंत्री यांच्यासह केंद्रीय मंत्री यांची भेट घेत चर्चा केली होती. महाराष्ट्र चेंबरचे मेंबर नितीन इंगळे, महेंद्र रायसोनी, संगीता पाटील, किरण बच्छाव, पुरुषोत्तम तावरे यात सहभागी होते.
तिकीट बुकिंगला सुरुवात
विमान कंपनीने २७ मे ते २६ ऑक्टोबर दरम्यान गोवा जळगाव पुणे या विमानसेवेचे शेड्युल तयार केले आहे. त्यानुसार तिकीट बुकिंगला देखील सुरुवात झाली आहे. यात गोवा – जळगाव – गोवा ही सेवा दररोज पुणे – जळगाव – पुणे ही सेवा आठवड्यातील मंगळवार, गुरुवार, शुक्रवार आणि रविवार अशी राहील.
