‘पहिला डोस राज्यसभेचा, दुसरा डोस विधान परिषदेचा, आता बूस्टर डोसची तयारी’- आमदार प्रा. राम शिंदे

भाजप आता राज्य सरकारला बूस्टर डोस देण्याच्या तयारीत आहे. यामुळे जिल्ह्यात आता कोणी पक्ष सोडून जाणार नाही. आपल्या जिल्ह्यातील दोन जिल्हा परिषद सदस्यांनी काही दिवसांपूर्वी राष्ट्रवादी काँग्रेसमध्ये प्रवेश केला. आता ते तोंडावर आपटले असतील. येत्या काळात भाजपचे पूर्ण ताकदीने राज्यात सरकार येणार आहे, असं मोठं वक्तव्य राम शिंदे यांनी केलं. राज्यात आणि देशात जेव्हा केव्हा पोटनिवडणुका होतात तेव्हा भाजपचे सरकार पुन्हा येताना दिसतंय. नगर जिल्ह्यात यापेक्षा वेगळं वातावरण राहणार नाही. आणखी एक आमदार जिल्ह्यात वाढणार आहे. आता चार आमदार झाले आहेत. पक्ष नेतृत्वाने घेतलेला निर्णय आपल्याला उपयोगात आणायचा आहे. जेष्ठ नेते प्राध्यापक राम शिंदे यांची विधान परिषदेवर निवड होऊन आमदार झाल्याबद्दल अहमदनगर जिल्हा भाजपच्या वतीने त्यांचा सत्कार करण्यात आला. स्थानिक स्वराज्य संस्था निवडणूक, मार्गदर्शन व नियोजन, बैठकीच्या कार्यक्रम प्रसंगी राम शिंदे बोलत होते.