‘सर्व धागेदोरे मातोश्रीपर्यंत जातील, अनिल परब हे मातोश्रीचे…’; नीलेश राणे यांचा आरोप

कोकणात राजापूर येथे रिफायनरी प्रकल्प होणारच

कोकणात राजापुरात रिफायनरी होणारच असे सांगत शिवसेनेच्या विरोधाला आता दम राहिलेला नाही अशी बोचरी टीका माजी खासदार नीलेश राणे यांनी केला आहे. नीलेश राणे हे रिफायनरी प्रकल्प स्वागत मेळाव्यासाठी आज राजापूर येथे आले होते. यावेळी त्यांनी पत्रकरांशी संवाद साधला.

यावेळी त्यांनी ईडीकडून सुरू असलेल्या चौकशीबाबत मंत्री अनिल परब व मुख्यमंत्री उद्धव ठाकरे यांच्यावर जोरदार हल्ला शाब्दिक हल्ला केला. अनिल परब हे मातोश्रीचा एजंट आहेत. त्यामुळे हे सगळे धागेदोरे मातोश्रीपर्यंत पोचणार. उदया उद्धव ठाकरे यांना या कारवाईमध्ये घेतले तर आश्चर्य वाटायचे कारण नाही. कारण अनिल परब हे त्यांचेच एजंट आहेत. त्यांची एजंटगिरी कोणासाठी होती हे चौकशीत बाहेर येईलच असेही राणे म्हणाले.

चंद्रकांत खैरेंवरही साधला निशाणा

चंद्रकांत खैरे यांची खासदारकी गेली त्यामुळे ते सरबरीत झाले आहेत. त्यात आता संजय पवार यांना खासदारकी मिळाल्याने भर पडली आहे. खैरे यांना शिवसेनेत किंमत राहिलेली नाही अशी टीका निलेश राणे यांनी खैरे यांच्यावर केली आहे. भाजपने एमआयएम आणि बहुजन वंचित आघाडीला एक हजार कोटी दिले असे खैरे यांनी म्हटले होते या विधानाचाही निलेश राणे यांनी राणे स्टाईलने समाचार घेतला.