राज्यातील दुष्काळी परिस्थितीचा शरद पवारांकडून आढावा; सोलापूरमधील १३९ गावांना फटका, १३५ टँकरने पाणीपुरवठा

Sharad Pawar Solapur Visit :राज्यात यंदा पावसाने पाठ फिरवल्याने अनेक भागांत दुष्काळसदृश परिस्थिती निर्माण झाली आहे. पाण्याअभावी शेतकरी अडचणीत सापडले असून पिण्याच्या पाण्याचाही प्रश्न गंभीर होत आहे. या पार्श्वभूमीवर ज्येष्ठ नेते शरद पवार यांनी शेतकऱ्यांच्या बांधावर जाऊन दुष्काळी परिस्थितीचा आढावा घेतला.

यावेळी त्यांनी सोलापूर, धाराशिवसह इतर दुष्काळग्रस्त भागांतील परिस्थितीवर चिंता व्यक्त केली. या भागांमध्ये शेतकऱ्यांना तातडीने मदत देण्याची गरज असल्याचे त्यांनी सांगितले.

सोलापूरमधील १३९ गावांना दुष्काळाचा फटका

सोलापूर जिल्ह्यातील १३९ गावांना दुष्काळाचा फटका बसला असून या गावांमध्ये १३५ टँकरद्वारे पाणीपुरवठा केला जात आहे. माढा तालुक्यातही पाण्याची मोठी टंचाई निर्माण झाली आहे. या परिस्थितीत राज्य सरकारने केंद्र सरकारकडे मदतीसाठी पाठपुरावा करावा, असे आवाहन शरद पवार यांनी केले.

दुष्काळग्रस्त भागांतील शेतकऱ्यांना आर्थिक मदत मिळणे आणि नागरिकांना पिण्याचे पाणी उपलब्ध करून देणे अत्यंत महत्त्वाचे असल्याचेही त्यांनी अधोरेखित केले.

हेही वाचा –  हाडे मजबूत ठेवण्यासाठी आहारात करा या पदार्थांचा समावेश; कॅल्शियमच्या नैसर्गिक स्रोतांची माहिती

खडकवासला धरणातील पाणीसाठ्याबाबत चिंता

पुणे शहराला पाणीपुरवठा करणाऱ्या खडकवासला धरणातील पाणीसाठाही कमी होत असल्याकडे शरद पवार यांनी लक्ष वेधले. त्यामुळे उपलब्ध पाण्याचा वापर जपून करण्याची गरज असल्याचे त्यांनी सांगितले.

दिवाळीनंतर पुण्यात एक दिवसाआड पाणीपुरवठा होण्याची शक्यता असल्याचेही त्यांनी नमूद केले.

दुष्काळाच्या संकटात राजकारण बाजूला ठेवण्याचे आवाहन

दुष्काळाच्या संकटात शेतकऱ्यांना आर्थिक मदत आणि नागरिकांना पिण्याचे पाणी उपलब्ध करून देणे ही प्राथमिकता असली पाहिजे. अशा परिस्थितीत राजकारण बाजूला ठेवून सर्वांनी एकत्र येऊन दुष्काळग्रस्तांना मदत करावी, असे आवाहन शरद पवार यांनी केले.

महाईन्यूज-X वर फॉलो करा : महाईन्यूजला instagram वर फॉलो करा