“तरुणांनो, जागे व्हा!… ज्येष्ठ समाजसेवक अण्णा हजारे यांची जळजळीत प्रतिक्रिया”

पुणे : मत चोरण्याच्या आरोपांची चर्चा सुरू असतानाच पुण्यातील पाषाण परिसरात ज्येष्ठ समाजसेवक अण्णा हजारे यांना उद्देशून काही बॅनर झळकले. “आता तरी उठा, मत चोरी झालेली आहे” असा सवाल करणाऱ्या या फलकांनी चर्चेचा भडका उडवला आहे. लोकपाल आंदोलनानंतर देशभरात प्रसिद्धीझोतात आलेले अण्णा हजारे पुन्हा एकदा चर्चेत आले असून, या फलकांमुळे त्यांनी नाराजी व्यक्त केली आहे.

“मीच सगळं करत राहावं, ही अपेक्षा चुकीची!” : अण्णा हजारे

या बॅनरनंतर अण्णा हजारे यांनी आपल्या पहिल्या प्रतिक्रियेत स्पष्ट शब्दांत नाराजी व्यक्त केली. “मी दहा कायदे आणले. पण 90 व्या वर्षातही मीच सगळं करत राहावं आणि तुम्ही झोपून राहावं, ही अपेक्षा चुकीची आहे,” असे ते म्हणाले. त्यांनी तरुणांना थेट आव्हान दिलं की, त्यांच्या कार्याचा वारसा पुढे नेत देशासाठी सक्रिय व्हावं.

“तिरंगा हातात घेणं पुरेसं नाही; कर्तव्यही आहे!” : अण्णा हजारे

स्वातंत्र्य दिन साजरा करताना केवळ उत्सव साजरा करून थांबू नका, असं सांगत अण्णांनी तरुण पिढीला जागं केलं. “देशाचे नागरिक म्हणून आपले काही कर्तव्य आहे की नाही? बोट दाखवून काहीही साध्य होणार नाही,” असा थेट सवाल त्यांनी केला.

“युवा शक्ती हीच राष्ट्र शक्ती!”

अण्णा हजारे यांनी आपल्या भाषणात तरुणांवर असलेल्या अपेक्षाही मांडल्या. “युवा शक्ती ही राष्ट्र शक्ती आहे. ती जागृत झाली, तर देशाचे भविष्य उज्ज्वल आहे,” असे ते ठामपणे म्हणाले. वयोमानामुळे आता थेट आंदोलनांपासून दूर राहिले असले, तरी त्यांच्या मनात देशासाठीची जळजळ कायम आहे.

गांधीविचारांची प्रेरणा घेऊन लढा!

अण्णांनी तरुणांना गांधीवादी विचारांनी प्रेरित होऊन सामाजिक आणि आर्थिक प्रश्नांवर लढण्याचे आवाहन केले. “एवढ्या वर्षांच्या लढ्यानंतरही समाज जागृत झाला नाही, हे वाईट वाटते,” असे सांगत त्यांनी सामाजिक उदासीनतेवर खंत व्यक्त केली.

अण्णांची पुन्हा एकदा साद

मत चोरण्याच्या वादग्रस्त पार्श्वभूमीवर पुन्हा एकदा अण्णा हजारे यांचं नाव पुढे आलं आहे. पण त्यांनी ही जबाबदारी नाकारत, ती आता देशाच्या तरुण पिढीने स्वीकारावी, असं स्पष्ट केलं आहे. अण्णांचा संदेश एकाच वाक्यात ठळक होतो — “जागे व्हा, लढा, आणि देश घडवा!”