पुणे, साताऱ्यासह चार जिल्ह्यांत अवकाळी पावसाची हजेरी; उकाड्यापासून दिलासा, शेतकऱ्यांच्या आशा पल्लवित

पुणे : राज्यात गेल्या काही दिवसांपासून वाढलेल्या उकाड्याने नागरिक हैराण झाले असतानाच रविवारी पुणे, अहिल्यानगर, सातारा आणि बीड जिल्ह्यांतील काही भागांत अवकाळी पावसाने हजेरी लावली. काही ठिकाणी जोरदार सरींमुळे रस्त्यांवर पाणी साचले, तर काही भागांत पावसामुळे वातावरणात गारवा निर्माण झाला. या पावसाने नागरिकांना उकाड्यापासून काहीसा दिलासा मिळाला असून, शेतकऱ्यांच्याही आशा पल्लवित झाल्या आहेत.

हिंजवडीत जोरदार पाऊस; रस्त्यांवर साचले पाणी

पुण्यातील आयटी पार्क म्हणून ओळखल्या जाणाऱ्या हिंजवडी परिसरात रविवारी संध्याकाळी दमदार पाऊस झाला. अचानक आलेल्या पावसामुळे आयटी पार्क परिसरातील काही रस्त्यांवर पाणी साचले. परिणामी वाहनचालक आणि नागरिकांची तारांबळ उडाली.

दरम्यान, पिंपरी-चिंचवड शहरात संध्याकाळपासून ढगाळ वातावरण होते. याच वातावरणादरम्यान शहरातील काही भागांसह हिंजवडीतही अवकाळी पावसाच्या सरी कोसळल्या.

जामखेडमध्ये विजांच्या कडकडाटासह पाऊस

अहिल्यानगर जिल्ह्यातील जामखेड शहरातही पावसाच्या जोरदार सरी बरसल्या. गेल्या अनेक दिवसांपासून वाढत्या उकाड्याचा सामना करणाऱ्या नागरिकांना या पावसामुळे काहीसा दिलासा मिळाला.

शहरातील विविध भागांत विजांच्या कडकडाटासह हलक्या ते मध्यम स्वरूपाचा पाऊस झाला. काही ठिकाणी पावसाचा जोर अधिक होता. त्यामुळे परिसरातील तापमानात घट होऊन वातावरणात गारवा निर्माण झाला.

हेही वाचा –  ‘पंतप्रधान होण्याचे स्वप्न कधीच पूर्ण होणार नाही’; अमित शाहांचा राहुल गांधींना खोचक टोला

साताऱ्यात रस्त्यांवरून वाहू लागले पाणी

सातारा शहरासह ग्रामीण भागातही पावसाने जोरदार हजेरी लावली. अनेक ठिकाणी पावसाचे पाणी रस्त्यांवरून वाहू लागले. या पावसामुळे शेतकऱ्यांमध्ये समाधानाचे वातावरण आहे.

शेतातील ऊस आणि ज्वारीच्या पिकांसाठी हा पाऊस उपयुक्त ठरेल, अशी अपेक्षा शेतकऱ्यांकडून व्यक्त केली जात आहे.

बीडच्या आष्टी तालुक्यातही पावसाच्या सरी

बीड जिल्ह्यातील आष्टी तालुक्यातील निमगाव बोडखा, कडा आणि परिसरातही रविवारी पावसाने हजेरी लावली. दुपारी आणि सायंकाळच्या सुमारास काही भागांत हलका ते मध्यम स्वरूपाचा पाऊस झाला.

गेल्या दोन महिन्यांपासून पावसाच्या प्रतीक्षेत असलेल्या शेतकऱ्यांना या सरींमुळे काहीसा दिलासा मिळाला आहे. मात्र, हा पाऊस पुरेसा नसून आणखी पावसाची गरज असल्याचे शेतकऱ्यांचे म्हणणे आहे. त्यामुळे पुढील काळात पाऊस कधी आणि किती पडणार, याकडे शेतकऱ्यांचे लक्ष लागले आहे.

पुढील पावसाकडे नागरिकांसह शेतकऱ्यांचे लक्ष

राज्यातील काही भागांत झालेल्या अवकाळी पावसामुळे नागरिकांना उकाड्यापासून तात्पुरता दिलासा मिळाला आहे. तसेच पावसाच्या प्रतीक्षेत असलेल्या शेतकऱ्यांनाही काहीशी आशा निर्माण झाली आहे. मात्र, शेतीसाठी आणखी पावसाची आवश्यकता असल्याने आगामी काळात पावसाची साथ कायम राहणार का, याकडे सर्वांचे लक्ष लागले आहे.

महाईन्यूज-X वर फॉलो करा : महाईन्यूजला instagram वर फॉलो करा