दुष्काळग्रस्त शेतकऱ्यांना दिलासा! सुका चारा 12 रुपये, तर मुरघास 8 रुपये किलोने खरेदी होणार

मुंबई : राज्यातील दुष्काळग्रस्त शेतकरी आणि पशुपालकांसाठी राज्य सरकारने महत्त्वाचा निर्णय घेतला आहे. संभाव्य चारा टंचाईवर मात करण्यासाठी सुका चारा आणि मुरघास खरेदीचे कमाल दर निश्चित करण्यात आले आहेत. त्यानुसार सुका चारा प्रतिकिलो कमाल 12 रुपये, तर मुरघास प्रतिकिलो कमाल 8 रुपये दराने खरेदी करण्यास सरकारने मान्यता दिली आहे. महसूल मंत्री तथा दुष्काळ निवारण समितीचे अध्यक्ष चंद्रशेखर बावनकुळे यांच्या अध्यक्षतेखाली झालेल्या निर्णयानंतर 30 ऑक्टोबर रोजी यासंदर्भातील शासन निर्णय जारी करण्यात आला.

राज्यातील 304 तालुक्यांमध्ये दुष्काळ जाहीर

2026 मधील दुष्काळी परिस्थितीच्या पार्श्वभूमीवर राज्यातील 304 तालुक्यांमध्ये दुष्काळ जाहीर करण्यात आला आहे. या परिस्थितीत पाणी आणि चारा टंचाई निर्माण होण्याची शक्यता लक्षात घेऊन सरकारकडून विविध उपाययोजना केल्या जात आहेत.

चारा खरेदीचे दर निश्चित करण्यासाठी सरकारने अभ्यासगटाची स्थापना केली होती. या अभ्यासगटाने सुका चारा आणि मुरघास खरेदीसाठी दर निश्चित करण्याची शिफारस केली होती. 27 ऑक्टोबर रोजी झालेल्या मंत्रिमंडळ उपसमितीच्या बैठकीत या शिफारशींना मान्यता देण्यात आली. त्यानंतर 30 ऑक्टोबर रोजी शासन निर्णय प्रसिद्ध करण्यात आला.

चाऱ्याच्या गुणवत्तेसाठी कठोर अटी

सुका चारा खरेदी करताना त्याच्या गुणवत्तेची विशेष काळजी घेण्याचे निर्देश प्रशासनाला देण्यात आले आहेत. सुका चारा चांगल्या दर्जाचा, आंबट किंवा कुबट वास नसलेला असावा. तसेच त्याला बुरशी, माती किंवा कीड लागलेली नसावी, अशा अटी घालण्यात आल्या आहेत.

सुका चारा खरेदी करताना ज्वारी आणि बाजरीला प्राधान्य देण्याची सूचना करण्यात आली आहे. याशिवाय सुक्या चाऱ्यातील ओलाव्याचे प्रमाण 15 टक्क्यांपेक्षा जास्त नसावे, असे स्पष्ट करण्यात आले आहे.

हेही वाचा –  ‘मुख्य आरोपींना अटक करा, समर्थकांना सोडून द्या’; राम पूर्णेकरांची पोलिसांकडे मागणी

मुरघासाचीही गुणवत्ता तपासणी बंधनकारक

मुरघास खरेदी करतानाही गुणवत्ता तपासणी करणे बंधनकारक करण्यात आले आहे. खरेदी करण्यात येणारा मुरघास हवाबंद अवस्थेत असावा आणि त्याला कोणत्याही प्रकारची बुरशी लागलेली नसावी, असे शासन निर्णयात नमूद करण्यात आले आहे.

चाऱ्याच्या विविध घटकांची तपासणी करण्यासाठी पुणे, औंध यांसह शासनमान्य प्रयोगशाळांमध्ये सुविधा उपलब्ध करून देण्यात आल्या आहेत.

वाहतूक खर्चासाठी स्वतंत्र निधी

सुका चारा आणि मुरघासासाठी निश्चित करण्यात आलेले दर हे वाहतूक खर्च वगळून आहेत. त्यामुळे चारा वाहतुकीसाठी स्वतंत्र निधी उपलब्ध करून देण्याची तरतूद करण्यात आली आहे. परिवहन आयुक्तांनी वेळोवेळी निश्चित केलेले वाहतूक दर यासाठी लागू राहणार आहेत.

2026-27 या दुष्काळी कालावधीत या खरेदी दरांची अंमलबजावणी केली जाणार आहे. सरकारच्या या निर्णयामुळे दुष्काळग्रस्त भागातील पशुधनासाठी चारा उपलब्ध करून देण्याच्या उपाययोजनांना मदत होण्याची अपेक्षा आहे.

चारा खरेदीचे महत्त्वाचे दर

सुका चारा : कमाल 12 रुपये प्रति किलो

मुरघास : कमाल 8 रुपये प्रति किलो

सुक्या चाऱ्यातील ओलावा : कमाल 15 टक्के

वाहतूक खर्च : वरील खरेदी दरांमध्ये समाविष्ट नाही; स्वतंत्र तरतूद

महाईन्यूज-X वर फॉलो करा : महाईन्यूजला instagram वर फॉलो करा