भूतानमध्ये हिमनदी सरोवर फुटल्याने महापूर; गरम पाण्याचा झरा उद्ध्वस्त, भारतातील सीमावर्ती भागांना सतर्कतेचा इशारा

Bhutan Glacial Lake Burst :  भूतानमधील गासा जिल्ह्यात शिंताफू त्शो हिमनदी सरोवरातून पाण्याचा प्रचंड प्रवाह बाहेर पडल्याने मोठे नुकसान झाले आहे. या पुराच्या तडाख्यात प्रसिद्ध गासा त्साचू गरम पाण्याचा झरा पूर्णपणे वाहून गेला असून, पुनाखा-गासा महामार्गाच्या काही भागांचेही नुकसान झाले आहे. त्यामुळे या मार्गावरील वाहतूक बंद करण्यात आली. आतापर्यंत कोणतीही जीवितहानी झाल्याचे वृत्त नाही.

सरोवरातून बाहेर पडलेल्या पाण्यामुळे संकोश नदीला पूर आला आहे. ही नदी भूतानमध्ये उगम पावते आणि भारतात प्रवेश केल्यानंतर आसाम व पश्चिम बंगालच्या सीमावर्ती भागातून वाहत पुढे ब्रह्मपुत्रा नदीला मिळते. त्यामुळे पश्चिम बंगाल आणि आसाममधील नदीकाठच्या भागांना सतर्कतेचा इशारा देण्यात आला आहे.

पश्चिम बंगालमधील अलीपूरद्वार जिल्ह्यात प्रशासनाने १० हजारांहून अधिक नागरिकांना सुरक्षित ठिकाणी आणि मदत शिबिरांमध्ये हलवले आहे. नागरिकांना संभाव्य पुराची माहिती देण्यासाठी आणि तातडीने घरे सोडण्याचे आवाहन करण्यासाठी रात्रभर सायरन वाजवण्यात आले. एनडीआरएफ, एसडीआरएफ आणि आपत्ती व्यवस्थापन पथकांनाही मदतकार्यासाठी तैनात करण्यात आले आहे.

भूतानमधील पाणी भारतात कसे पोहोचते?

शिंताफू त्शो हिमनदी सरोवरातून बाहेर पडलेले पाणी प्रथम भूतानमधील मो छू नदीच्या पाणलोट क्षेत्रात वाहते. पुढे मो छू आणि फो छू या नद्या एकत्र येऊन पुनात्सांगछू नदी तयार होते. ही नदी दक्षिणेकडे वाहत भारतात प्रवेश करते. भारतात या नदीला संकोश नदी म्हणून ओळखले जाते.

संकोश नदीच्या पाण्याच्या पातळीत वाढ झाल्यास पश्चिम बंगालमधील अलीपूरद्वार आणि जलपाईगुडीच्या सखल भागांमध्ये तसेच आसाममधील कोकराझार आणि धुबरी जिल्ह्यांमध्ये पूरस्थिती निर्माण होण्याची शक्यता आहे. पुढे ही नदी आसाममध्ये ब्रह्मपुत्रा नदीला मिळते. त्यामुळे भूतानमधील हिमनदी सरोवरातून बाहेर पडलेले पाणी भारताच्या मैदानी भागांपर्यंत पोहोचू शकते.

हेही वाचा –  दुष्काळग्रस्त शेतकऱ्यांना दिलासा! सुका चारा 12 रुपये, तर मुरघास 8 रुपये किलोने खरेदी होणार

भूतानमध्ये पूर कुठे आणि कसा आला?

२९ ऑक्टोबरची संध्याकाळ : भूतानमधील गासा जिल्ह्यातील लाया गेओग येथील लुंगो परिसरातील शिंताफू त्शो सरोवरातून पाणी वाहू लागले.

धोकादायक सरोवर : हे सरोवर वाकिला पर्वतरांगांच्या पायथ्याशी असून, भूतानमधील संभाव्य धोकादायक १७ हिमनदी सरोवरांपैकी एक आहे.

पाण्याचा वेगवान प्रवाह : सरोवरातून बाहेर पडलेले पाणी मो छू नदीच्या पाणलोट क्षेत्रातून वेगाने पुढे सरकले.

रात्री सव्वा आठच्या सुमारास : पुराचे पाणी ताक्तसेमाखांग परिसरात पोहोचल्याचे वृत्त आहे.

मोठे नुकसान : पाण्याच्या जोरदार प्रवाहामुळे प्रसिद्ध गासा त्साचू गरम पाण्याचा झरा पूर्णपणे उद्ध्वस्त झाला.

भारतातील सीमावर्ती भागांमध्ये सतर्कता

भूतानमधील पुराच्या पार्श्वभूमीवर पश्चिम बंगाल आणि आसाममधील नदीकाठच्या भागांमध्ये प्रशासनाकडून खबरदारी घेतली जात आहे. अलीपूरद्वारमध्ये नागरिकांचे स्थलांतर, सायरनद्वारे सूचना आणि आपत्ती व्यवस्थापन पथकांची तैनाती करण्यात आली आहे. नदीच्या पाण्याच्या पातळीवर लक्ष ठेवून संभाव्य पूरस्थितीचा सामना करण्यासाठी यंत्रणा सज्ज ठेवण्यात आली आहे.

महाईन्यूज-X वर फॉलो करा : महाईन्यूजला instagram वर फॉलो करा