पुणे पदवीधरची जागा भाजपला; शिवसेनेत नाराजी कायम, एकनाथ शिंदेंनी दिला ‘युतीधर्म’ पाळण्याचा संदेश!

पुणे : पुणे पदवीधर मतदारसंघाची जागा भाजपच्या वाट्याला गेल्याने शिवसेनेच्या शिंदे गटात नाराजी असल्याचे समोर आले आहे. पुण्यातील शिवसेना पदाधिकाऱ्यांनी उपमुख्यमंत्री एकनाथ शिंदे यांची भेट घेऊन निवडणुकीसाठी केलेल्या तयारीची माहिती दिली. तसेच जागावाटपात हा मतदारसंघ शिवसेनेला न मिळाल्याबद्दल नाराजी व्यक्त केल्याची माहिती आहे. यावेळी एकनाथ शिंदे यांनी पदाधिकाऱ्यांना युतीधर्म पाळण्याच्या सूचना दिल्याचे सूत्रांनी सांगितले.

या बैठकीला मंत्री उदय सामंत, पुण्याचे माजी आमदार रवींद्र धंगेकर आणि शिवसेनेचे इतर पदाधिकारी उपस्थित होते. पुणे पदवीधर मतदारसंघ भाजपला मिळाल्याने स्थानिक पातळीवर निर्माण झालेली नाराजी दूर करण्याचे आव्हान पक्षासमोर असल्याचे चित्र आहे.

विधान परिषद निवडणुकीत जागावाटपावरून नाराजी

महाराष्ट्र विधान परिषदेच्या पदवीधर आणि शिक्षक मतदारसंघांच्या निवडणुकांची रणधुमाळी सुरू आहे. पुणे शिक्षक, पुणे पदवीधर, अमरावती शिक्षक, छत्रपती संभाजीनगर पदवीधर आणि नागपूर या पाच मतदारसंघांमध्ये निवडणूक होत आहे. जागावाटप आणि उमेदवारीवरून काही ठिकाणी बंडखोरीही पाहायला मिळाली.

पुणे शिक्षक मतदारसंघावर शिवसेनेच्या शिंदे गटाने दावा केला होता. या मतदारसंघातून निवडणूक लढवण्यासाठी मंगेश चिवटे इच्छुक होते. मात्र, महायुतीच्या जागावाटपात ही जागा भाजपच्या वाट्याला गेली. त्यानंतरही चिवटे यांनी उमेदवारी अर्ज दाखल केला होता. मात्र, अर्ज मागे घेण्याच्या अंतिम दिवशी त्यांनी आपला अर्ज मागे घेतला. तरीही शिवसैनिकांमधील नाराजी कायम असल्याचे वृत्त आहे.

पुण्यातील बंडखोरी शमवण्यात यश

पुणे पदवीधर आणि शिक्षक मतदारसंघांतील बंडखोरी शमवण्यासाठी महायुतीकडून प्रयत्न करण्यात आले. राष्ट्रवादी काँग्रेसचे भैया माने यांनी पुणे पदवीधर मतदारसंघातून दाखल केलेला उमेदवारी अर्ज मागे घेतला. त्यानंतर भाजपच्या उमेदवार स्मिता जाधव यांचा प्रचार करणार असल्याचे त्यांनी सांगितले.

पुणे शिक्षक मतदारसंघातून उमेदवारी अर्ज दाखल केलेले शिवसेनेचे मंगेश चिवटे यांनीही प्रतिनिधीमार्फत अर्ज मागे घेतला. त्यामुळे भाजपचे उमेदवार कौस्तुभ गावडे यांच्यासमोरील अडचणी कमी झाल्या.

दुसरीकडे, महाविकास आघाडीतही उमेदवारीवरून हालचाली झाल्या. शिक्षक मतदारसंघात काँग्रेसचे जयंत आसगावकर उमेदवार असताना राष्ट्रवादी काँग्रेस शरदचंद्र पवार पक्षाच्या अश्विनी कदम यांनीही उमेदवारी अर्ज दाखल केला होता.

हेही वाचा –  कचऱ्यापासून सीबीजी निर्मितीला चालना; महाराष्ट्रातील शहरांमध्ये प्रकल्प उभारणीसाठी टास्क फोर्स स्थापन करणार

२३ ऑक्टोबरला मतदान, २७ ऑक्टोबरला मतमोजणी

महाराष्ट्र विधान परिषदेच्या तीन पदवीधर आणि दोन शिक्षक मतदारसंघांसाठी जाहीर झालेल्या वेळापत्रकानुसार, २३ ऑक्टोबर २०२६ रोजी मतदान होणार असून २७ ऑक्टोबर रोजी मतमोजणी आणि निकाल जाहीर होणार आहेत.

निवडणूक वेळापत्रक

अधिसूचना : २९ सप्टेंबर २०२६

उमेदवारी अर्ज दाखल करण्याची अंतिम तारीख : ६ ऑक्टोबर २०२६

अर्जांची छाननी : ७ ऑक्टोबर २०२६

अर्ज मागे घेण्याची अंतिम तारीख : ९ ऑक्टोबर २०२६

मतदान : २३ ऑक्टोबर २०२६, सकाळी ८ ते दुपारी ४

मतमोजणी व निकाल : २७ ऑक्टोबर २०२६

महाईन्यूज-X वर फॉलो करा : महाईन्यूजला instagram वर फॉलो करा