‘तुम्हाला भेटल्यानंतर आत्महत्येचा विचार दूर झाला’; शेतकऱ्याची व्यथा ऐकून एकनाथ शिंदेंनी दिला धीर

अकोला : दुष्काळसदृश परिस्थितीची पाहणी करण्यासाठी उपमुख्यमंत्री एकनाथ शिंदे यांनी बुधवारी अकोला जिल्ह्यातील शेतकऱ्यांशी संवाद साधला. बाळापूर तालुक्यातील व्याळा गावात पिकांची पाहणी करताना शेतकरी समाधान सुरकर यांनी पावसाअभावी झालेल्या नुकसानीची व्यथा मांडली. यावेळी बोलताना ते भावुक झाले आणि, ‘तुम्हाला भेटल्यानंतर आत्महत्येचा विचार दूर झाला,’ असे त्यांनी शिंदे यांना सांगितले. या प्रसंगाची माहिती वृत्तवाहिन्यांनी दिली आहे.

समाधान सुरकर यांची बाळापूर तालुक्यातील कान्हेरी गवळी गावात पाच एकर शेती आहे. त्यांच्या शेतात सोयाबीन आणि तुरीचे पीक आहे. मात्र, पावसाने दीर्घकाळ दडी मारल्याने उभी पिके वाळून गेल्याचे त्यांनी शिंदे यांना सांगितले. शेतातील पिकांची अवस्था दाखवताना सुरकर भावुक झाले आणि आपल्या मनातील व्यथा मांडली.

अकोला जिल्ह्यात पावसाच्या दीर्घ खंडामुळे सोयाबीनसह खरीप पिकांचे मोठे नुकसान झाल्याचे यापूर्वीही समोर आले आहे. सप्टेंबरच्या सुरुवातीला जिल्ह्यात ४० ते ४५ दिवस पाऊस नसल्याने सोयाबीन पिके सुकत असल्याचे वृत्त आले होते.

हेही वाचा –  आयआयटी पवई प्रकरणाच्या तपासाला मोठा अडथळा; साहिल वाकोडेचा आयफोन अद्याप अनलॉक नाही

शेतकऱ्याची व्यथा ऐकल्यानंतर एकनाथ शिंदे यांनी त्यांना धीर दिला. सरकार शेतकऱ्यांच्या पाठीशी असल्याचे आश्वासन त्यांनी दिले. दुष्काळी परिस्थितीच्या पार्श्वभूमीवर नुकसान झालेल्या पिकांचे पंचनामे करण्याच्या सूचना देण्यात आल्या असून, शेतकऱ्यांना मदत देण्यासाठी प्रशासनाने प्रत्यक्ष पाहणीवर भर दिला आहे.

दरम्यान, मुख्यमंत्री देवेंद्र फडणवीस हेही लातूर, धाराशिव आणि सोलापूर जिल्ह्यांच्या दौऱ्यावर असून शेतकऱ्यांच्या बांधावर जाऊन पिकांची पाहणी करत आहेत. फडणवीस आणि शिंदे यांच्याकडून दुष्काळग्रस्त भागांचा प्रत्यक्ष आढावा घेतला जात आहे.

राज्यातील विविध भागांमध्ये पावसाचा खंड आणि खरीप पिकांचे नुकसान लक्षात घेता, नुकसानग्रस्त शेतकऱ्यांना तातडीची मदत, पिकांचे पंचनामे आणि पाणीपुरवठ्याच्या उपाययोजना याकडे आता लक्ष लागले आहे.

महाईन्यूज-X वर फॉलो करा : महाईन्यूजला instagram वर फॉलो करा