‘आवारापन 2’ची बॉक्स ऑफिसवर जोरदार कमाई; तीन दिवसांत ८२ कोटींचा गल्ला

मुंबई : अभिनेता इमरान हाश्मीचा बहुचर्चित ‘आवारापन 2’ चित्रपट सध्या बॉक्स ऑफिसवर दमदार कामगिरी करत आहे. प्रदर्शनापूर्वीपासूनच चर्चेत असलेल्या या चित्रपटाने थिएटरमध्ये दाखल झाल्यानंतरही प्रेक्षकांचा चांगला प्रतिसाद मिळवला आहे. अवघ्या तीन दिवसांत चित्रपटाने ८२ कोटी रुपयांची नेट कमाई केल्याचे समोर आले आहे.

‘आवारापन 2’ने पहिल्याच दिवशी २२ कोटी रुपयांची कमाई केली. दुसऱ्या दिवशी चित्रपटाच्या कमाईत मोठी वाढ झाली आणि तब्बल ३३.७५ कोटी रुपये गल्ल्यात जमा झाले. रविवारी तिसऱ्या दिवशी कमाईत काहीशी घट झाली असली तरी चित्रपटाने २६.५ कोटी रुपयांची कमाई केल्याचे सॅकनिल्कच्या अर्ली ट्रेंड रिपोर्टमध्ये नमूद करण्यात आले आहे.

त्यामुळे पहिल्या तीन दिवसांत चित्रपटाची एकूण नेट कमाई ८२ कोटी रुपयांवर पोहोचली आहे. विशेष म्हणजे ‘आवारापन 2’ने ओपनिंग वीकेंडच्या कमाईत अजय देवगणच्या **‘धमाल 4’**ला मागे टाकले आहे. ‘धमाल 4’ने ओपनिंग वीकेंडमध्ये ६७.२१ कोटी रुपयांची कमाई केली होती.

तीन दिवसांत ८२ कोटींची कमाई करत ‘आवारापन 2’ने यंदाच्या सर्वाधिक ओपनिंग वीकेंड कमाई करणाऱ्या चित्रपटांच्या यादीत तिसरे स्थान मिळवल्याचे सांगितले जात आहे. या यादीत ‘धुरंधर 2’ ४६६ कोटी रुपयांच्या कमाईसह पहिल्या, तर ‘बॉर्डर 2’ १२९.८९ कोटी रुपयांच्या कमाईसह दुसऱ्या क्रमांकावर आहे.

हेही वाचा –  राहुल गांधींनी मोदी-शहांचा सन्मान ठेवावा; हसन मुश्रीफ यांची टीका

आता ‘आवारापन 2’ने ८२ कोटींचा टप्पा पार केल्याने चित्रपटाची नजर १०० कोटींच्या क्लबवर आहे. सध्याचा कमाईचा वेग कायम राहिल्यास चित्रपट लवकरच १०० कोटींचा आकडा पार करण्याची शक्यता व्यक्त केली जात आहे.

‘आवारापन 2’ने आतापर्यंत ‘मैं वापस आऊंगा’, ‘है जवानी तो इश्क होना है’ आणि ‘पति पत्नी और वो दो’ यांसारख्या चित्रपटांच्या लाइफटाइम कलेक्शनलाही मागे टाकल्याचे सांगितले जात आहे.

या चित्रपटात इमरान हाश्मीने पुन्हा एकदा शिव पंडित ही भूमिका साकारली आहे. नितिन कक्कड यांनी चित्रपटाचे दिग्दर्शन केले असून, दिशा पटानी, शबाना आझमी आणि पूरन गब्बी यांच्या महत्त्वाच्या भूमिका आहेत.

‘आवारापन 2’ हा २००७ मध्ये प्रदर्शित झालेल्या ‘आवारापन’चा सिक्वेल आहे. पहिल्या भागाला रिलीजच्या वेळी बॉक्स ऑफिसवर अपेक्षित यश मिळाले नव्हते; मात्र कालांतराने त्याला कल्ट चित्रपटाचा दर्जा मिळाला. ‘आवारापन 2’ १४ ऑगस्ट रोजी चित्रपटगृहांमध्ये प्रदर्शित झाला आहे.

महाईन्यूज-X वर फॉलो करा : महाईन्यूजला instagram वर फॉलो करा