15 जूनपासून शाळा ऑनलाईन सुरु होणार, शिक्षण आयुक्तांची माहिती
मुंबई | लाॅकडाऊनचा सध्या चौथा टप्पा सुरु आहे आणि केंद्र सरकारच्या पुढच्या निर्णयाची सगळे जण आतुरतेनं वाट पाहत आहेत. जून महिन्यात साधारणपणे शाळा सुरु होतात. सध्याच्या परिस्थितीमध्ये शाळा कधी आणि कशा सुरु होणार याकडे विद्यार्थी आणि पालकांचं लक्ष लागलं आहे. यांसर्भात शालेय शिक्षण विभागानं महत्त्वपूर्ण निर्णय घेतला आहे. विद्यार्थ्यांचं शैक्षणिक नुकसान होऊ नये म्हणून 15 जूनपासून शैक्षणिक वर्ष सुरु करणार असल्याचं शिक्षण आयुक्त विशाल सोळंकी यांनी सांगितलं.
शैक्षणिक वर्ष सुरु होणार म्हणजे शाळा सुरु होणार असं नाही. तर 15 पर्यंत जास्तीत जास्त विद्यार्थ्यांपर्यंत डिजिटली पोहोचून त्यांचा अभ्यास सुरु करणार असल्याचं विशाल सोळंकी यांनी एका मराठी वृत्त वाहिनीशी बोलताना सांगितलं.
“15 जूनपासून शैक्षणिक वर्ष सुरु करत आहोत. म्हणते डिजिटली मुलांपर्यंत पोहोचून त्यांचा अभ्यास घेण्याचा प्रयत्न केला जाईल. पाठ्यपुस्तकांच्या वाहतुकीची परवानगी मिळाली आहे. त्यामुळे 15 जूनच्या आधी जास्तीत जास्त पाठ्यपुस्तक वितरित करण्याचा प्रयत्न आहे,” अशी माहिती विशाल सोळंकी यांनी दिली.
शाळा सुरु करण्याचा निर्णय हा लाॅकडाऊनच्या निर्णयावरही अवलंबून असल्याचं ते म्हणाले. 31 मे पर्यंत लाॅकडाऊन आहे. त्यानंतर केंद्र सरकार आणि राज्य सरकार काय निर्णय घेतं यावरही शाळा कधी सुरु होणार हे अवलंबून राहील. पण विद्यार्थ्यांचं शैक्षणिक नुकसान होणार नाही यासाठी 15 जूनपासून डिजिटली शैक्षणिक वर्ष सुरु करणार असल्याचं विशाल सोळंकी यांनी सांगितलं. यामुळे 15 जूनपासून शाळा प्रत्यक्षात सुरु जरी झाली नाही तरी विद्यार्थ्यांचा अभ्यास मात्र सुरु होईल.