हजारो कोटींच्या बँक घोटाळयातील आरोपी नीरव मोदीचा पत्ता सापडला
पंजाब नॅशनल बँकेत हजारो कोटींचा घोटाळा करुन फरार झालेला मुख्य आरोपी नीरव मोदी इंग्लंडमध्ये वास्तव्याला आहे. ब्रिटीश यंत्रणांनी भारत सरकारला ही माहिती दिली. परराष्ट्र राज्यमंत्री व्ही.के.सिंह यांनी राज्यसभेमध्ये ही माहिती दिली. मँचेस्टरच्या नॅशनल सेंट्रल ब्युरोने नीरव मोदी इंग्लंडमध्ये राहत असल्याची माहिती दिली आहे असे व्ही.के.सिंह यांनी सांगितले.
नीरव मोदीचे भारताकडे प्रत्यार्पण करण्यासंदर्भात केंद्र सरकारने ऑगस्ट २०१८ मध्ये ब्रिटन सरकारला विनंतीचे दोन अर्ज पाठवले होते. एक अर्ज सीबीआय़च्या तर दुसरा अर्ज अंमलबजावणी संचलानलयाकडून करण्यात आला होता. हे दोन अर्ज ब्रिटन सरकारच्या विचाराधीन असल्याची माहिती सिंह यांनी दिली.
भारत सरकारच्या परराष्ट्र मंत्रालयाने जून महिन्यात अनेक युरोपियन देशांना पत्र लिहून नीरव मोदीचा ठावठिकाणा शोधून काढण्यासाठी मदत मागितली होती. नीरव मोदी पंजाब नॅशनल बँकेतील ११,३०० कोटीपेक्षा जास्त रक्कमेच्या घोटाळयातील मुख्य आरोपी आहे.