विधानसभा निवडणूकीसाठी आजपासून उमेदवारी अर्ज भरण्यास सुरुवात
पुणे |महाईन्यूज |प्रतिनिधी|
‘विधानसभा निवडणुकीसाठी शुक्रवारपासून (दि. २७) उमेदवारी अर्ज भरण्यास सुरुवात होणार असून, अतिवृष्टीचा परिणाम निवडणूक कामकाजावर होणार नाही. अंतिम मतदारयादी प्रसिद्ध झाल्यानंतर २४ सप्टेंबरपर्यंत ४६ हजार ५७१ मतदारांचे अर्ज आले आहेत,’ असे जिल्हाधिकारी नवल किशोर राम यांनी सांगितले.
‘जिल्ह्यात ७६ लाख ८६ हजार ६३६ मतदार होते. उमेदवारी अर्ज भरण्याच्या अंतिम दिवसापासून १० दिवस आधीपर्यंत मतदारांकडून नावनोंदणीसाठी अर्ज मागवण्यात आले होते. त्यानुसार २४ सप्टेंबरपर्यंत ४६ हजार ५७१ अर्ज आले. त्यांपैकी २८ हजार ९८९ नागरिकांची नावे पुरवणी मतदारयादीत समाविष्ट करण्यात आली आहेत. १७ हजार ५८२ अर्जांवर येत्या दोन दिवसांत निर्णय घेतला जाणार आहे. ३ हजार ३२६ अर्ज नामंजूर झाले आहेत,’ असे जिल्हाधिकारी राम यांनी स्पष्ट केले.
‘जिल्ह्यात ७ हजार ६६६ कायमस्वरूपी, २४९ साह्यकारी अशी ७ हजार ९१५ मतदान केंद्रे आहेत. त्यांपैकी २८२ मतदानकेंद्रे तात्पुरती शेडच्या स्वरूपाची असणार आहेत,’ असेही ते म्हणाले. दरम्यान, जिल्ह्यातील २१ विधानसभा मतदारसंघांसाठी आठ खर्च निरीक्षक नियुक्त करण्यात आले आहेत.
मतमोजणीची ठिकाणे
‘वडगावशेरी, शिवाजीनगर, कोथरूड, खडकवासला, पर्वती, हडपसर, पुणे कँटोन्मेंट आणि कसबा पेठ या आठ विधानसभा मतदारसंघांची मतमोजणी ही कोरेगाव पार्क येथील भारतीय खाद्य गोदामात (एफसीआय) येथे होणार आहे. पिंपरी-चिंचवड शहरातील चिंचवड, पिंपरी आणि भोसरी या तीन विधानसभा मतदारसंघांची मतमोजणी बालेवाडी येथील श्री शिवछत्रपती क्रीडासंकुल येथे होणार आहे. जुन्नर, आंबेगाव, खेड आळंदी, शिरूर, दौंड, इंदापूर, बारामती, पुरंदर आणि भोर या १० विधानसभा मतदारसंघांची मतमोजणी स्थानिक पातळीवर केली जाणार आहे,’ अशी माहिती जिल्हाधिकारी राम यांनी दिली.
