मायावतींनी तोडली समाजवादी पक्षासोबतची युती, सर्व निवडणुका स्वबळावर लढण्याची घोषणा
बहुजन समाज पक्षाच्या अध्यक्ष मायावती यांनी अखिलेश यादव यांच्या समाजवादी पक्षासोबतची युती तोडली आहे. मायावती यांनी एकामागोमाग एक ट्विट करत यासंबंधी घोषणा केली आहे. छोट्या, मोठ्या सर्व निवडणुका आपण स्वबळावर लढणार असल्याचं मायावती यांनी जाहीर केलं आहे. ट्विटच्या माध्यमातून मायावती यांनी अखिलेश यादव यांच्याप्रती असलेली नाराजी व्यक्त केली आहे. महत्त्वाचं म्हणजे तीन आठवड्यांपुर्वीच मायावती यांनी अखिलेश यादव यांच्यासोबत चांगले संबंध ठेवण्याचं आश्वासन दिलं होतं.
मायावती यांनी ट्विट करत म्हटलं आहे की, ‘समाजवादी पक्षासोबत असणारे सर्व मतभेद बाजूला सारुन तसंच २०१२-१७ दरम्यान समजवादी पक्षाच्या सरकारने घेतलेल्या दलित विरोधी निर्णयाकडे, आरक्षणविरोधात केलेल्या कमांकडे तसंच कायदा सुव्यवस्थेत बिघाड झाला असतानाही फक्त जनहितार्थ आम्ही समाजवादी पक्षासोबत युतीचा धर्म निभावला हे जगजाहीर आहे’.
Mayawati✔@Mayawati
वैसे भी जगजाहिर है कि सपा के साथ सभी पुराने गिले-शिकवों को भुलाने के साथ-साथ सन् 2012-17 में सपा सरकार के बीएसपी व दलित विरोधी फैसलों, प्रमोशन में आरक्षण विरूद्ध कार्यों एवं बिगड़ी कानून व्यवस्था आदि को दरकिनार करके देश व जनहित में सपा के साथ गठबंधन धर्म को पूरी तरह से निभाया।
Mayawati✔@Mayawati
परन्तु लोकसभा आमचुनाव के बाद सपा का व्यवहार बीएसपी को यह सोचने पर मजबूर करता है कि क्या ऐसा करके बीजेपी को आगे हरा पाना संभव होगा? जो संभव नहीं है। अतः पार्टी व मूवमेन्ट के हित में अब बीएसपी आगे होने वाले सभी छोटे-बड़े चुनाव अकेले अपने बूते पर ही लड़ेगी।
पुढे केलेल्या ट्विटमध्ये त्यांनी म्हटलं आहे की, ‘लोकसभा निवडणुकीनंतर समाजवादी पक्षाच्या वागण्यात झालेल्या बदलामुळे आम्ही विचार करण्यास भाग पडलो आहोत की असं केल्याने भाजपाचा पराभव करणं शक्य आहे का ? हे शक्य नाही. यामुळे पक्षाचं हित लक्षात घेता बसपा आगामी सर्व छोट्या-मोठ्या निवडणुका स्वबळावर लढणार’.
रविवारी झालेल्या पक्ष बैठकीदरम्यान मायावती यांनी सांगितलं होतं की, ‘मी मतमोजणीच्या दिवशी अखिलेश यादव यांना फोन केला होता, मात्र त्यांनी काहीच उत्तर दिलं नाही. यानंतर जेव्हा पक्षाने विधानसभा पोटनिवडणूक स्वबळावर लढण्याचा निर्णय घेतला तेव्हा अखिलेश यादव यांनी बसपा नेते सतीश चंद्र मिश्र यांना बोलावलं, पण माझ्याशी चर्चा केली नाही’.
